眼看新Core2Duo上場，當然唔少砌機玩家都想立即試用呢粒最新CPU，而事實上據腦場老闆報料，話Core2Duo喺呢兩個禮拜價位企定之後，去貨相當理想，差不多成砌機必選。不過最近再行腦場，有另一位Sales透露，原來以整體嚟講，兩款PentiumD915同945亦相當好賣，尤其係所謂黃金嘜套裝機，銷情更係突出。原因好簡單，最終都係錢作怪，呢粒CPU抽起咗無關痛癢嘅新功能，對電腦效能無咩大影響，不過比高一級型號嘅CPU平咗近五百，喺黃金砌機以平至上嘅原則下，好賣都唔出奇。
記者、攝影：許福合
電腦街:ATI卡王四千開賣
ATI同nVIDIA鬥足咁多年，簡直有如Intel鬥AMD咁，大家不斷提升科技去爭客。ATI最新一款卡王X1900XTX，已經出現腦場，而一般價錢亦一如預期，可用天價嚟形容，各大品牌嘅X1900XTX卡開價三千八至四千，可以話貴得誇張！不過睇佢內置512MBGDDR3，又可以玩埋VIVO，而且最勁係支援HDTV，功能實在非常齊全，唔好話打機，駁Plasma睇碟已經係個好享受！不過值唔值，就睇你係唔係發燒玩家喇。
電腦街:平價945板
正所謂平有平玩，貴有貴玩，Core2Duo要玩得爽，起碼要有P965同E6300，不過淨係呢2件起碼$2,700以上，所以有貪平嘅用家，會先用過渡性方式，買張平平哋嘅945底板頂住先。不過要留意，雖然P945板外頻上已支援最新嘅1,066MHz，不過仲要睇埋供電係咪符合Core2Duo要求。場中支援Core2Duo嘅945底板中，功能較齊全有Gigabyte可選，價錢大約九百，而有啲二、三線牌子可以低至六百，視乎用家要多分唇定要平喇。
電腦街:DDR2667超800
好多最新型號嘅主機底板，已經可支援DDR800高速記憶體，不過物以罕為貴，512MBDDR2800由$990至$1,300都有，相信喺三星推出前，跌價機會不大。其實慢一級嘅DDR2667，好多質素都唔錯，大有機會穩超上800MHz，而價錢一般都係五百蚊左右，若果成功即係慳咗一半有多！當然使用上還須要一定超頻技巧，不過近排多咗人指定買DDR2667，睇怕都係咁玩法。
售賣點：Centralfield
查詢電話：23870272
地址：深水埗高登電腦商場1樓10-16a號舖