屋企光管或吊燈伸手莫及，一諗到要爬高爬低咁鬼煩，平日打掃都成了被忽略Item。久而久之啲燈封晒塵，好似玩緊《15/16》Dim燈咁，全屋燈光暗咗幾個Grade，搞到囝囝做功課變矇豬眼、老公睇電視話似入戲院、連我自己都爭啲因燈光問題落錯鹽同糖！睇嚟，我都要將全家重納光明正軌。之但係天花燈7、8呎高仲要係電器，要注意唔少清洗小竅門。
記者：鄧雪雲
攝影：伍慶泉
模特兒：Ruby@Salvador
鳴謝：基督教勵行會家務助理培訓導師Simon
「燈高」秘技 務必擔梯
1.左右腳應該分別站在企梯的兩邊。上梯的步驟應該先雙腳站在同一邊，然後一隻腳跨過另一邊的梯級上。
2.若果已經站在企梯的最高一級，但仍需要蹲高雙腳或者雙手伸直才可以觸到天花燈，即表示企梯的高度不足夠，需要換上另一度更高的企梯。最理想是雙手洗抹時約對着自己的心口位置。
3.不要站於企梯的最頂，這樣企梯會容易因失去平衡而翻傾，造成意外。
4.抹燈時應該企於天花燈的左或右側，若果站於燈下，頸及腰會因為長時間伸展而勞損。
5.就算家中沒有企梯，亦不要以摺椅代替，因為摺椅極容易翻傾，必要時可以有四隻腳的椅子代替企梯。
3級難度 各家自掃天花燈
不同燈飾有不同的清洗法，難易度亦不同。基本上需具備纖維成份的靜電雞毛掃（以防邊掃邊塵土飛揚）及靜電除塵布；清潔劑方面，一支全能清潔劑（如藍威寶）便足夠。環保法則用醋，不但可去塵除污，抹後亦能令燈球更光猛。另外，宜選海綿代替百潔布，以免弄花燈飾。
低難度
光管 出動靜電除塵布
要清潔光管其實好簡單，只需要將光管拆下來，用防靜電的除塵布抹一抹已經OK。若果真是太污糟的話，才用濕布，但千萬不要以水洗甚至成支光管放入水中浸，因為光管兩端的電源接駁位若果入了水的話，好容易漏電。至於光管一般採用膠殼，可以靜電除塵布抹拭或以濕布蘸萬用清潔劑清洗。
中難度
吊燈 白醋更光猛
將燈罩拆下，若屬膠製燈飾，算係最易清潔，只要將軟布蘸取玻璃水混和清水（比例為1：1），扭亁後抹擦膠燈表面，便可回復光亮。至於燈飾的金屬部份則只可以雞毛掃輕輕打掃，因為液體清潔劑很容易會令金屬脫色或生銹，所以可免則免。
好多人都知用清潔劑加濕布可以清洗玻璃燈上的污迹。但原來清水稀釋煮食用的白醋來抹洗玻璃燈，更可令玻璃變得「立立令」。若果玻璃組件可以拆下來用白醋加水浸10分鐘左右，清潔效果會更好。遇有窿窿罅罅，可以用軟毛牙刷掃走灰塵。
射燈 小心燙手
清潔射燈其實亦是用防靜電的除塵布抹一抹表面就可以了，毋須要將罩着燈泡的玻璃皮拆下來。但提提你咪以為射燈細細好易抹，其實布滿陷阱！因為射燈的熱度太高，若果散熱不足就開始清洗的話，好容易會灼傷皮膚。
高難度
水晶燈 記得逐粒抹
水晶燈可說是家居清潔的大敵，不單止組件多，而且矜貴易整爛，所以清潔時惟有用最無殺傷力的靜電雞毛掃，輕輕掃走塵埃。
若果水晶燈已經污糟得很，最好是用煤油為水晶打蠟，不過現今家庭已經好少使用煤油了，所以還是用回最方便的白醋加水吧！不過提醒各位最好逐粒逐粒抹洗，以妨水晶因互相碰撞而撞花。
徐太教落：熄燈等10分鐘
1.開關有序：不論你要清潔的是哪一款燈，第一件事當然是將燈關掉，如果唔係發生漏電就大件事！至於熄燈後，燈泡仍非常熱，所以不要太心急進行清潔。一般來說，應等10-15分鐘，以待燈罩及燈泡降溫才進行清潔。尤其使用濕布抹，因燈膽好薄，冷縮熱脹下很易爆裂。
2.戴膠手套：清洗時記得戴膠手套保護雙手和燈飾。
3.拆得就拆：若能拆解燈飾組合，最好拆下來清洗。
4.洗埋燈膽：洗燈順便連燈膽都抹抹。基本上用靜電除塵布輕拭便可。玻璃燈如上述可用醋水輕拭。
5.亁布再抹：只要有用過水或濕布，都一定要於最後以亁布抹一次。
6.由上而下：清潔任何一類燈飾，都應採取由上至下，由內至外的清潔方式。