Game事撻：率先搶試PSP《RR2》　OL扮開會激劈42賽道

玩賽車Game係男性專利已經Out啦！正如女性入行揸巴士已經好普遍，好多女仔玩起賽車Game甚至比男士更大膽！PSP《RidgeRacers2》快將推出，號稱收錄史上最多戰車同賽道，唔只一眾機迷準備車神上身，就算靚女OL一樣可以匿喺辦公室，暗地裏片鑊甘，玩熟咗仲可同隔籬位同事Wi-Fi對戰，唔怕開會悶親啦！
記者：陳國輝
攝影：陳陶鈞
ImageGirl：Neyuna

數到殿堂級賽車遊戲，《RR》系列絕對當之無愧！小記由街機版誕生第一代已經玩佢，亦睇住PS、PS2每一集Opening愈做愈靚，特別係其中一個女主角永瀨麗子嘅人設，更可能係每個Game迷嘅夢中情人！嚟到最新PSP版續集，可能太多資源投放到遊戲部份，或者UMD容量所限，今次永瀨嘅「戲份」明顯減少咗，成段Opening得30秒左右，到喉唔到肺；值得一讚係CG又靚咗，永瀨嘅皮膚仲一集比一集滑溜㖭！

■玩「DUEL」嘅關鍵在於適當使用Turbo，臨終點前追過電腦車！

■開場動畫做得好有氣氛，恍如戰鬥一觸即發！

■甩尾甩到拖住幾條紅光？證明速度感一流。

56版長期抗戰

叫機迷長煲街機原因，不外乎貪梳化座椅舒適、軚盤油門逼真，而且係咪相識都可隨時挑機；但係PSP版《RR》有啲唔同，小記玩過上集，覺得最吸引之處在於極豐富嘅場面，《RR1》多達36條賽道，今集更勁加至42條，收錄歷來出現過嘅所有賽道！唔好忘記，《RR》仲玩埋順走、逆走，難度又高幾倍。若然挑戰埋「WorldTour」，總版數已達到56關，癲過上集！
另一叫人長煲原因，就係想儲齊隱藏車！仲記得上集超無敵食鬼車，經進化後螺旋槳變成噴射器，速度更恐怖；加埋其他隱藏車，肯定要花更多時間去煲！

■咪見呢部隱藏車設計得咁OldSchool，玩過你就知有幾快！

■改良過嘅食鬼車雖外形變化唔大，但實力強勁！

隻抽模式似足《頭D》

論熱鬧，肯定係成班Friends開着晒Wi-Fi連線片車先過癮；但講到刺激，個人則認為One-on-One更令人心跳加速！記得喺《RR1》有幾版係由電腦隱藏車「欽點」要單挑玩家，由於電腦戰車能無限使用Turbo加速（硝化甘油），難度之高，令小記要「跳版」嚟應付，更幾乎掟機離場、放棄唔玩！冇諗到今集仲變態到將呢種玩法列入正規模式，命名「DUEL」，3圈賽事由頭到尾都只係一對一嘅比賽，感覺非常似《頭D》鬥片狹窄山路咁刺激！
除一如過往有街機模式外，今集仲新加「SURVIVAL」淘汰賽，每個賽道包尾嗰位立即淘汰！只要唔做「包尾大幡」，你就可以繼續留低，一路挑戰到最後賽事為止，愈後愈遇到厲害對手，即係話難度會愈嚟愈高！