年輕時曾由「鬼王」葉漢一手提拔的荷官鄭康樂，見證賭王何鴻燊在賭壇走上巔峯，今日目睹澳門開放賭權，為年輕的荷官感到慶幸。看盡澳門賭業30多年變化的他說：「做荷官最緊要有料，唔使憂會冇人睇中你，有機會高薪挖角跳槽。」
開設荷官訓練學校
70年代入行的鄭康樂，回想替葉漢打工時，在金碧賭場做荷官。賭番攤的賭仔不是三輪車伕、碼頭苦力便是水上人家。他說：「有啲賭仔連鞋都冇得着，赤住腳都要走嚟賭。當年低下階層嘅賭仔，都好怕荷官。」他後來轉投葡京賭場，看見的是另一個世界。他說：「見過當年有位港姐，入嚟賭錢嗰陣，斯文淡定。但輸到入肉就發晒爛渣。戙起隻腳，仲用粗口鬧人。」大家看得啼笑皆非。
他形容今時今日最多人賭的百家樂，70年代葡京僅得一枱，賭客主要是上流社會的富貴人家。百家樂賭枱四周圍起紅繩，有如警方封鎖現場，俗稱叫作「鬥牛場」。他說：「班闊太入嚟賭錢，都未坐低，帶備紙巾嘅跟班將兩叠紙巾放喺枱面，怕整污糟闊太雙玉臂。」
過去曾任工會領袖的鄭康樂，澳門回歸後結束荷官生涯，出任澳門幸運博彩業職工總會理事長，獲政府資助開設荷官訓練學校。他說：「以前何鴻燊獨家經營（賭場），邊有機會跳槽。」
本報記者