近日手機話題，每日總離唔開大插水減價嘅索愛K800i，由開賣價$3,980，唔使一個月即跌破三千，呢排上台仲可用$5,120出兩部（即每部$2,680）㖭！跌幅近兩成半，對於分唇相似、啱啱「上畫」嘅諾記N73嚟講，固然係當頭捧喝！但網民對減價一事卻有唔同睇法，兩幫人馬各持理據，拗到面紅耳熱、難分難解！
勁撐諾記嘅資深網民就話：「以牌子嚟講，Nokia係比較受歡迎，同埋講真K800i根本無咁多嘢玩。」又有人繼續撐：「N73可以入Software，功能多啲，比K800i好得多！」不過，索愛Fans好快即作出反擊：「K800i有閃燈（XenonFlash），N73有嗎？同埋佢支蔡司認證鏡咪得個名，有等於冇！」最後，呢場網上辯論雖然無疾而終，但講到呢期最爆最Hit嘅Topic，似乎非兩Brands大戰莫屬！
記者：陳國輝