基金愛股勝獅貨櫃（716）昨日公布中期業績，盈利倒退61％至1086萬美元，芬佬即時唔畀面勁沽，最低見過4.17元，收4.25元，大跌15.34％，成交股數1415.8萬股，金額6121萬元。
經紀黃話，呢排正值港股業績期，芬佬見到掂就即刻掃貨，唔掂就冇面畀沽貨，反應快得交關，連等多日睇埋證券行研究報告都覺得費事。
講起出業績，成日話炒注資的九洲發展（908），明日公布全年業績。經紀黃話，成績表應該見得人，同埋講咗好耐的注資大計亦陸續出籠。
九洲發展的珠海發展大計，小初好耐之前都聽過，但版本各有不同，都唔知信邊個好？經紀黃為隻股辯護，話佢走勢雖極遲緩，但起碼叫做硬淨，長期喺0.80元至0.90元之間上落。
九洲發展昨升1％，收0.96元，雖接近52周的高位，但捧場客就望穿秋水。
慕容小初