早一排，滙豐、渣打宣布中期業績，增長率唔曳，賺好多錢，細心睇真吓，呢兩間大銀行喺亞洲各地都做得好，偏偏不約而同，齊齊在台灣陰溝翻船，滙豐嘅台灣業務轉盈為虧，確係少見。
兩大銀行喺台灣唔掂，主因係信用卡呆壞賬太多。台灣經濟並非唔好，而係信用卡持有人碌爆卡，唔興找數。台灣商界人士好充面子，左丁山多年前經常到台灣，客戶招呼食晚飯，唔畀現錢，丟低張卡片就鬆人（嗰陣時台灣極少人有信用卡），叫餐廳寄張月結單去公司喎，餐廳居然又肯制，因此可以推測到台灣盛行人欠我，我欠人，每間公司嘅應收賬款數目會十分大，假如中間斷纜（有人到期唔找數），就會發生壞賬骨牌效應。現在台灣人人有信用卡，簽得過癮，銀行嘅風險就愈大，好易中招。
真正有水之台灣人就唔會賴賬嘅。賓架陳太太與另一個闊太去遮打大廈Armani/Bar食完午飯，喺置地廣場周圍行，最後行埋HarveyNichols，腳仔開始軟嘞，就到置地文華嘅MOBar飲番杯SakeTini（馬天尼之變種），一坐低就見到閨中好友K太位千金在座，傾談之下，K千金話聽聞台灣靚仔明星金城武來港拍戲，住在置地文華，拍完戲就會到MOBar飲番杯喎，所以特登嚟撞吓，希望見到靚仔明星。嗱，金城武呢類客就唔會簽卡走數啦！不過陳太心諗，點知等到幾時先至會見到金城武出現呀，K千金未免守株待兔。K千金又話中國四大名旦「水晶梨」都同時住響置地文華喎，拍戲吖嘛。陳太不知何謂四大名旦，更唔知誰是「水晶梨」。K千金話：「四大名旦即係鞏俐、章子怡、趙薇、徐靜蕾。用普通話發音，徐靜蕾就水晶梨。」陳太為之失笑，下一代對中港台明星之熟悉，可以考會考。啲明星住置地文華，一住幾個禮拜，房租十分可觀，不過明星級人馬大把銀紙，點會斤斤計較，佢哋淨係就近去蘭桂坊蒲夜店，飲一晚都花費萬零銀啦。