今年暑假，公司有個暑期工搞到我哋女同事暈晒大浪，因為佢個樣好似靚仔日本男星鈴木仁！前日成班同事圍住佢，唔止女仔，連男同事阿貴都喺度！原來佢哋叫「鈴木仁」幫手買電腦。
「鈴木仁」講，佢哋大專生只要出示學生證，喺蘋果電腦嘅巡迴展覽同蘋果網上商店，買MacBook、MacBookPro、iMac或MacPro，會最多慳成1,720蚊，買埋iPod仲有額外回贈最多千幾蚊。大家想知可打電話去蘋果電腦問吓：800-908-988。
佢仲話，理大學生可用特價買HP數碼產品，好似手提電腦HPCompaqtc4400由14,980蚊，減到9,588蚊。科大、城大學生就買到勁平嘅IBMThinkPad手提電腦，例如以5,148蚊買到6,352元嘅R60e。
咁着數，唔怪得連成日唔抵得「鈴木仁」多女仔鍾意嘅阿貴，都同人哋拍晒膊頭。我話想買一部，阿貴即刻話：「佢一個人買唔到咁多。」但「鈴木仁」話叫多啲同學幫我哋買。
我望一望靚仔又好人嘅「鈴木仁」，再望呀貴，開始明白咩叫「相由心生」。
逄周一至周四刊出