銅鑼灣么鳳係上等人嘅零食專門店，捧場客除咗「香港良心」陳方安生，原來恒隆地產執行董事吳士元（Terry，圖）亦鍾意食嗰度嘅話梅。
每年恒隆公布完業績後，吳士元就要飛去歐美各地見吓班基金投資者，恒隆前日派成績表，佢老兄星期日就要飛，見有排都冇機會見班傳媒好友，所以噚日約埋幾個記者行家吹水，恒隆公關大員買定COVA西餅招呼老記，Terry亦攞出佢樽至愛話梅宴客。華華係為食之人，啲話梅龍眼咁大粒，一睇就知靚嘢。Terry話，女仔鍾意食話梅，但佢係男人都好呢味嘢，不過並唔係吳太或者吳媽媽薰陶，純粹本身喜好。
Terry對員工都唔錯，話說恒隆近年積極拓展內地版圖，員工經常大陸香港兩邊飛，不過無論你係乜嘢職級，每次出差都可以坐商務客位。Terry話，飛嚟飛去咁辛苦，當然畀佢哋坐商務客位，最好有其他公司嘅人睇到，等班員工知道自己幾咁幸福，對公司就更加有歸屬感。