有乘客乘搭航機時，分別因行李被遺失及延誤抵達目的地，而蒙受金錢損失。消委會提醒乘客，宜將貴重物品放入手提行李，及在出發前購買旅遊保險，減少因行李遺失或延誤所造成的損失。
個案一：旅客李先生向本報投訴，他早前乘搭泰國東方航空公司航班，由香港前往泰國曼谷旅行，並將一件行李寄艙，可是他抵埗後，在機場行李輸送帶欲領回行李時，竟發現行李不知所終，為他帶來金錢損失和不便。
「我件行李入面放滿晒旅行嘅日用品，除咗衫褲鞋襪仲有相機同名牌鎖匙包，而且個行李篋都仲好新。今次唔見咗啲行李，除咗損失金錢，仲搞到好唔方便，要花時間買過晒啲替換衫褲同埋日用品，旅行都玩得唔開心。」
難確定遺失原因
李先生稱，回港後他向航空公司索償，可是結果更令他氣憤，「佢哋話根據我件行李嘅重量，只係會賠950蚊，真係有冇搞錯，我一部相機都唔止咁多錢，用行李重量嚟定賠償，對乘客真係好唔公平。」
泰國東方航空公司李小姐回覆本報查詢稱，該公司機票條款列明，會根據乘客行李重量，釐定賠償額，據李先生所申報行李的重量，該公司會賠償950元。李小姐稱，由於寄艙行李的運送涉及不同部門及工序，故難以確定遺失原因。檔案編號：0809009
個案二：旅客張小姐向本報投訴，她早前於香港乘搭法國航空公司班機，經法國巴黎前往西班牙巴塞隆拿公幹辦貨，可是兩度遇上行李延誤到達，令她狼狽不堪，行程亦大受影響，更蒙受金錢損失。
「我嗰件行李本來係手提嘅，不過臨上機有職員話我件行李要寄艙，本來我都唔想，但為咗唔影響班機，我惟有照做。點知去到巴塞隆拿，我呢件行李唔知去咗邊。我喺機場等咗幾個鐘頭，最後因為要趕去另一個城市，又唔知再等會唔會搵到，惟有走先，但係就要買過晒啲日用品，真係好煩。結果第二日佢至通知我搵番件行李。」
寄艙涉保安問題
可是萬料不到，同樣事故再次發生在張小姐回程期間。「嗰日由巴塞隆拿飛返巴黎，我其中一件大行李又試唔知喺邊，今次我真係好擔心，因為我啲手袋貨物值成十幾萬，放晒喺件行李度，如果唔見咗就真係損失慘重，所以我留喺巴黎等消息。呢兩日我真係行唔安、食唔落，又要自己畀錢住酒店，等咗兩日先搵番件行李。」
法國航空公司函覆本報查詢稱，在國際航空運輸中，行李寄艙的過程比較複雜並涉及保安問題，行李接受與輸送的安全與監管服務，通常由機場當局及其代理提供，很大程度上取决於相關機場的狀況，但法航一直致力與有關機場及部門溝通，盡力為乘客提供優質服務。
法航表示，會研究所有客人的建議，作為日後改進服務的參考依據。該公司會給予張小姐適當補償。
但張小姐對法航給予她的補償甚不滿。「佢哋畀我嘅所謂補償係2,000蚊禮券，等第日搭佢哋嗰時用。我對佢哋都失晒信心啦，仲會搭咩！呢啲賠償真係不賠也罷，我唔會接受。」張小姐不忿地說。
檔案編號：0727008