光天化日，四名兇徒公然圍毆一名立法會議員，已經目無法紀，更離譜的是，犯案地點竟然是在一間熙來攘往的鬧市快餐店內，就更加無法無天。
傳媒話，案發快餐店分三層（地面、地庫一層、地庫二層），何俊仁和黨友林子健母子兩人在地庫二層食緊嘢，快餐店當時有20幾個食客（計埋佢哋在內），三個兇徒將何俊仁按在地上用棍狂毆，打足五分鐘，其他食客個個嚇到走人，而另一同黨就在快餐店地面門口把風。
香港人怕事，見到咁嘅場面即走，無可厚非。不過，要走到一個安全位先打三條九，就恐怕太遲，兇徒都一早散晒。
有一套系列嘅書叫做《WorstCaseScenario》，專教人在危難時，比如身陷浮沙或遭綁架時如何脫困，𠵱家思哲「馬後炮」，當我幫本書加多一節，講吓何俊仁被毆的「黃金五分鐘」內，究竟應該做乜先可以即時制止兇徒？
首先，由傳媒提供嘅資料分析兇徒部署：
1.兇徒將鴨舌帽拉低──驚俾人認得個樣；
2.不發一言──唔想留低聲音（或口音）成線索；
3.一同黨在門口把風──監視有差人到即通知同黨散水
短結：兇徒想盡量將特徵掩藏，怕俾人認到。
據講血案發生時，20幾個食客已「紛紛逃走」，斷估一分鐘已經足夠有餘，即是話，餘下嗰四分鐘內，地庫只係得三個兇徒、何俊仁同埋林子健母子。
以前日已逃離地庫二層的食客為例，推斷大多數只能有以下反應（或策略）：
1.有咁遠走咁遠，唔關我事；廿
2.自己打三條九或通知快餐店職員報警
3.走出街嗌救命，希望有人會挺身而出
短結：可惜的是，打三條九都唔可以即時制止毆鬥；嗌救命就更唔使旨意有人應，有人被毆，與我何干？
除報警外，如果當時好鬼驚（一般人正常反應），但又好想即刻制止毆打拯救何俊仁，可以留意以下幾點：
1.環境──當時快餐店分地面、地庫一層、地庫二層
2.同黨──除行兇者外，應盡量留意有冇同黨（好易認，因為佢哋嘅打扮寧舍遮遮掩掩，怕俾人認出）
短結：考慮環境和尋找同黨，就係保障自己安全。
思哲好清楚呢間「牡丹樓」嘅佈局，兇徒要逃出血案現場（即地庫二層），得一條路，而且地庫下行兇睇唔到地面情況，所以兇徒一定要有同黨把風，確保一但風吹草動即刻通知同黨散水。
把風者和三個打手由於處身不同層數（通訊受地形隔阻），又被地庫一層隔開，所以，只要在無人看管的地下一層位置，高聲大嗌：「亞Sir，你哋嚟得啱，就係戴鴨舌帽嗰三個！」
16字救命句子分析：
1.亞Sir──令兇徒以為有差人
2.你哋嚟得啱──令兇徒錯覺剛巧有兩個以上差人到場
3.就係戴鴨舌帽嗰三個──一語道出兇徒最忌的特徵，製造恐慌心理
短短16個字，大聲讀出，直插打手要害，令他們恐慌。
俾人拉到事小，被迫供出幕後黑手就事大；至於把風的同黨，就更加不知所措，無法預計是否已有差人（可能係便裝差人）由地下一層趕往地下二層，自保方法，同樣係走為上策。三個打手，都係有理無理走咗先算，一個唔覺意把風者已經走咗，咪弊？
如果要再增加恐慌感，可以試圖阻塞唯一通道，將啲凳推落樓梯，再大嗌「唔好畀佢哋走！」睇班兇徒驚未。
如果做到嘅話，好可能已經可以在黃金五分鐘的一半時間內（約兩分半鐘），令何俊仁唔使再捱打。
產銅公司處理罷工露端倪
銅價升，礦公司自然水漲。過去一年，銅價由每公噸3550美元，攀升至上周五的7480，升幅達1.1倍，今日業績公布的江銅（358）應可受惠，分析員估江銅最少每股賺6毫25，最樂觀者更估2.3元，以噚日收市價計，PE咪得番3倍幾？
另一邊廂，同樣產銅的全球最大礦公司BHP，此刻最頭痛者，是如何平息持續已兩星期的智利銅礦Escondida大罷工。
Escondida去年產銅量佔全球逾8%，BHPBilliton是大股東，佔Escondida57.5%股份。現在該礦僅維持在產量四成左右。基於心理因素，市場普遍認為罷工一日未解決，銅價都會繼續升。
但思哲唔同意呢種睇法，Escondida大罷工，其實係因為工人眼紅銅價大升，公司大賺自己卻無份，所以罷工乃「果」，銅價升才是「因」。不過，BHPBilliton管理層企硬唔肯加人工，因為佢哋都唔睇好銅價，怕人工易加難減。
𠵱家銅礦局部停工已足足兩星期，試想像，如果BHP管理層認為銅價升勢持續，加些少又有乜所謂？條數好易計，約2000個工人，只要畀6000萬獎金，每個人即袋3萬美金，智利人均收入一年大概1萬美金，你話啲礦工會唔會即刻復工？
如果馬上恢復生產，以Escondida嘅產量，幾日已經賺番晒。但𠵱家管理層反而同班礦工慢慢斟，拖足兩星期，又為乜呢？明顯係睇淡銅價走勢，怕順得哥情失嫂意，日後銅價跌人工升，到時點同班股東交代？不過，管理層亦有其他壓力，因為如果BHP讓步，智利國企銅礦Codelco睇怕都要相應加薪，到時做壞規矩就無謂。
其實睇淡銅價嘅又何止BHPBilliton？話說江銅一樣有做期銅對沖，其實照價賣銅就實賺，不過唔知佢哋管理層有冇叻過頭，沽期銅重手得滯，分分鐘蝕凸。
尹思哲