𠵱家喺香港，做球迷嘅，只要肯畀錢裝兩個收費電視解碼器，真係日日都可以有波睇。好似前晚咁，一般周一晚上最多只有英超聯直播，當晚雖然無，但都有一場英格蘭聯賽盃直播。戲碼雖然只係阿克寧頓主場對諾定咸森林，但場波都幾多嘢值得我求大俠同大家講吓。
場波首先搵嚟其中一位最富娛樂性講波佬做中文旁述，我求大俠一聽到佢把「有今生無來世」嘅聲音，雖然半夜開波都即刻醒一醒神；佢講波之餘，亦同時講咗好多題外話，例如話森林位阿根廷籍守將係「三級球員」等等。
據呢位莊諧並重嘅講波佬所講，對賽兩軍平時嘅比賽，可能都無乜機會被揀做全球直播嘅關係，兩軍領隊着晒西裝執到靚一靚示人；場上球員波衫上亦印晒佢哋嘅名，分分鐘踢平時嘅低組別聯賽都無咁認真。
門將救到都縮手？
至於場波，最後爆出冷門，由被睇淡嘅主隊阿克寧頓贏1:0，我求大俠一邊睇住，其實都唔覺得意外；事關森林實力雖高一皮，但只派出一班副選球員應戰，畀對手衝幾衝就散晒。最戥一班上盤客唔抵嘅係，森林輸嗰球波，個門將明明係好似可以用手拍番個波出嚟，但竟然臨時縮手！唔通佢哋諗住就算晉到級，都無乜機會爭標，所以打假……！？
「星期四晚（周五凌晨），仲有一場聯賽盃直播，奧連特主場對西布朗，希望繼續聽到呢位評述員為比賽做粵語旁述啦！」