中資銀行股嘅業績潮，噚日由交通銀行揭開序幕，唔知係咪要顯示國際化，一開波，董事長蔣超良就用英文做簡介，口音似足架仔講英文，好彩之後答問全程講番煲冬瓜，否則大家實行聽到耳都側。
由於前行長張建國喺7月25日辭任，跟手就走咗去建行做行長，所以大家最關心嘅事，就係懸空咗個幾月嘅行長一職，幾時有人補上。蔣董耍咗一輪太極，又讚到張建國上天，話佢走咗係間行嘅損失，結果都係冇料爆，只係話任命一批，就會喺香港搞發布會，等大家見吓新行長。
股民跟住張建國走？
有傳媒話，呢次調任，係大股東利益凌駕小股民之舉，白白將個咁有料到嘅行長，送咗過去競爭對手建行度。蔣超良忍唔住口爆咗句：「唔通張建國走咗去建行，啲人就會走晒去買建行咩！」