梁漢文（梁炳）將於10月8號起喺紅館舉行兩場「梁漢文我愛廚房演唱會」，噚日佢舉行記者會，着咗成套黑色DiorHomme新裝亮相，仲請嚟節目《美女廚房》嘅粗眉食神兼評判周中師傅擔任嘉賓。周師傅保持佢喺節目裏面嘅搞笑本色，一上台就搞gag，現場嘉賓都笑到碌地，爭啲搶晒梁炳風頭。
搬蕭邦靚琴上台
周師傅噚日喺台上露兩手，仲猛讚自己手勢好，又話佢煮嘅餸「唔會嘔，一定食得」，梁炳提佢話啲菜式已經煮好嗰陣，周師傅即刻話：「撈多兩嘢先啦，你仲要撈嘛，撈起佢！」現場嘉賓聽到都拍晒手掌。
問梁炳點解演唱會個名會叫做「我愛廚房」？佢話係因為之前搵咗林夕將舊歌《纏綿遊戲》重新填詞，變成新歌《我愛廚房》，所以連演唱會都改呢個名。
梁炳仲話今次會用總值超過1,000萬嘅名貴鋼琴伴奏，其中一部仲係蕭邦百幾年前用過嘅無價寶。至於嘉賓方面，梁炳就話希望可以請到楊千嬅同陳奕迅上嚟重組「華星三寶」，不過好多嘢仲要開會傾，唯一係希望可以畀觀眾深刻嘅視覺效果喎。
