領匯（0823）上市至今股價長升長有，兼有息派，但大股東TCI就仍然唔係咁滿意，上月派人入董事局，無論炒人又好、加租又好，總之就要催谷盈利，看來早晚有大動作，難怪陳偉業議員咁擔心，趁明日AGM前夕，寫信畀曾蔭權要跟進呢件事，驚死主席鄭明訓冇得留低。
一開始全城都對TCI對沖基金嘅身份非常歧視，又話佢「狙擊」，又話佢會將領匯煎皮拆骨。但其實HedgeFund都分好多個流派，例如distressedsecurities一門，就專吼一啲被大幅低估價值資產嘅，然後執過盤數賺更多錢，直頭係坐艇散戶救星，大家無謂仇視TCI。
思哲估計TCI入局只係第一步，將來若提全面收購，先係戲肉。以領匯昨日收報$16.18計，市值約350億，以目前持有領匯18.35%的TCI出雙倍價提出全面收購，代價只係要570億，無論成功與否，都只會有贏冇輸。而可以預想嘅情況有兩個：
情況一：收購失敗
TCI以雙倍價提全面收購，領匯股價至少應聲急升一倍，就算收購失敗，TCI賣出手頭貨源，都只怕有賺冇蝕。
情況二：收購成功
領匯旗下近八萬車位，就當車位平均15萬一個，已經超過100億；計埋118個商場，總值已超過270億；不要忘記，只要將其中幾個重點大型商場大執，包裝到好似又一城A貨，市值已經過百億（註：中信年初出售又一城50%股權，袋60億），呢筆已經至少值370億，未計其他中小型商場大幅翻新過之後的升值空間。肯定有排賺，超值。順帶一提，雖然領匯上市條文規定商場不可以斬件出售，但一次過批出長達50年（或100年）的商場使用權，如此斬件又如何？
思哲最百思不得其解者，反而係陳偉業做乜要為鄭明訓嘅前途咁操心？人哋假假哋都做咗商人銀行家咁多年，使鬼你啲草根鬥士關心咩！
造油管冇錢賺
英國石油公司（BP）最近關閉美國最大的阿拉斯加普拉德霍灣油田，原因係輸油管滲漏問題嚴重，需要大執。根據美國運輸部資料，今年因為油管侵蝕而流失的石油高達68624桶，而BP出現腐蝕的輸油管其實已經用咗成30年（一般油管只係設計用25年），不過如果唔係油價已經升咗咁多，真係整番都嘥藥費。
目前，美國輸油管平均使用年齡為50年。而國際能源機構表示，為了滿足國際石油及天然氣需求，各國將需要在2030年前花上約48萬億港元，其中包括維修上世紀70年代興建的石油設施。
從以上推算，製造油管的生產商豈不是會發達？這豈不是一個重大商機？如果趁勢買入製造油管公司的股份，例如Halliburton呢啲專做油田設備配備嘅大公司（其前CEO就係美國現任副總統切尼），豈非賺硬？可惜的是，真正大贏家唔係佢哋，係原材料供應商至真。
製造輸油管並唔需要乜嘢高科技，好多公司都有能力做到，技術成本又唔高，反而係製造油管的原材料鋼鐵價格先至係關鍵。近年鋼鐵價格緊跟金價上揚，令唔少製造商需要付上高昂代價，這正正反映生產過程中的附加價值相當低，因此，油管生產商的毛利主要好睇原材料成本，而非生產過程中的增值技術。
馬會應買晒聯賽播映權
英超開鑼一星期未到，電視廣播（0511）旗下無綫收費電視高調宣布，未來三屆的英超播映權志在必得。香港人對英超情有獨鍾，其獨家播映權特別值錢。有分析員認為，有線寬頻（1097）要保住呢塊「鎮台之寶」，至少要花10億。
上禮拜一，有線公布中期業積，至06年6月30日，收費電視客戶七十七萬。以10億元留客，成本不過每人約130元，本來無傷大雅。其收費電視業務ARPU（即每戶每月平均收入）雖然下跌3%，但仍有209元。弊在互聯網及多媒體業務的ARPU，亦下跌6%至163元。有線3000幾個員工，出糧已經使咗4.3億，比05同期升9.3%。經營盈利8625萬，比去年同期跌44.7%。未計花喺買西甲播映權的1.3億，仲有歐洲其他聯賽...為英超豪擲10億，是否明智之舉？
不過，保唔住英超播映權，即使慳番10億，有線睇怕都五勞七傷。10萬收費電視客以ARPU209元，當合約期18個月計，將合共失去逾3億元收入。不要忘記，對手擅長交叉銷售，該10萬客的收費電視及寬頻收入將被一併搶走。另一水源廣告，估計減2.34億收入，股值最終難免受壓。總之，有線呢鋪慳又死，唔慳又死。
思哲大膽建議，馬會不如一次過買晒所有聯賽的播映權，然後免費任由各台聯播，索性大家都唔使爭。條數點計？香港人去年花成千億進行合法賭博，賭波投注額已經佔313億。其實，除咗最熱門的歐洲聯賽外，其他地區，例如非洲、日本等國際賽事非常缺乏，甚至沒有轉播頻道。免費得到四大聯賽播映權的條件，就是必須播放其他冷門賽事，同埋「官方」賠率，實行一家便宜幾家（台）着。
以後要爭客，唔該用高質素節目去爭。總之，球迷成為最後得益者，咁就皆大歡喜。
尹思哲