歐冠盃，一項令人好期待的賽事，因為佢係每年最高水平的球會級足球比賽！不過，我指嘅係32強開始，至於外圍賽，我則覺得只係一般，所以，心水自然一般；講得再坦白點，呢類波，大家唔知兩隊實力，盲摸摸，死得！
小弟身邊有唔少自認是專業「投資者」，日日睇波經、電腦、盤路……，令到自己可以講得出英德意西法、巴挪瑞葡日有乜球隊，兼可以講出白蘭恩係邊個國家的聯賽球隊！但係，其實好多人將手頭上的資金全部做晒善事，因為佢哋無睇波，齋睇球隊賽績，結果死得！
紅軍作客宜博「細」
今晚，利記對住海法馬卡比，比賽喺中立場舉行，上回合紅軍已贏2:1，加歷查今場唔出得，懷斯亦受傷，對住馬卡比，去盡定留力？今晚紅軍0:0都可以出線，所以我只對大細有信心，預計開細。紅軍摸住踢，一球上落。我知道賓尼廸斯的戰術，上半場會交白卷，70分鐘開始進攻，無收穫就會守到完場！
至於華倫西亞放走艾馬之後，呢隊波我都冇晒信心，直情連提都唔想提，希望佢喺外圍賽出局，專心打聯賽好過！至於阿仙奴，上回合已經贏咗3球，次回合和波都出線，開細好正路！
周鵬
商業1台《球迷集中贏》主持
電郵：[email protected]