古巨基最近推出新歌《愛得太遲》，除邀得老友周慧敏（Vivian）拔刀相助擔任MV女主角外，更成功請得已10年沒有錄新歌的她開金口合唱。拍攝該曲MV期間Vivian因喊足兩日致兩眼紅腫兼頭痛，基仔笑言願為奴為婢之餘，還可以身相許來報答對方！
周慧敏近年頻頻曝光，除拍廣告搵真銀外，早前還舉行慈善演唱會，但她表示暫仍無意復出樂壇。
不過最近Vivian卻被好友古巨基打動，合唱其新歌《愛得太遲》，早前兩人還拍攝新歌MV。
喊樣多多
古巨基昨日到商台接受訪問時，透露Vivian為了拍攝《愛》曲MV而哭得兩眼紅腫，他說：「MV入面話我同Vivian愛得太遲，大家受到折磨，所以有好多場都要用喊嚟表達。今次辛苦晒靚女，佢喊足兩日，雖然佢冇拍戲好耐，但仍然可以喊到好多款，好似堅強嘅喊同脆弱嘅喊咁，之後佢兩隻眼都腫晒，頭又痛。」
10年沒有灌錄新歌的Vivian，難得今次願開金口跟基仔合唱，令基仔感激不已，還笑言要以身相許來答謝。記者問基仔可是因為Vivian和倪震情海翻波才這樣說？基仔即為兩位老友解釋道：「冇呀！佢哋好好呀！如果只係請食飯就太少，要我為奴為婢都冇問題㗎！」
基仔續說：「Vivian10年冇送過咁大份禮畀我，但原來佢本身已經好鍾意呢首歌，拍MV之後佢一直將首歌留喺電話度不斷聽，佢話夠膽講，佢聽呢首歌仲多過我喎！」
採訪、攝影：王連連
