明知開徵銷售稅換嚟「噓」聲多過掌聲，但港府仍然要拎出嚟測試反對聲音有幾大，都算係「大無畏」。一向敢言嘅恒隆地產主席陳啟宗（洋名朗尼），噚日喺恒隆系業績記者會後被問到對銷售稅嘅意見時，話自己嗰啲並非主流意見。莫非呢個旺角兼銅鑼灣大業主，居然贊成開徵銷售稅？
非也！佢話政府講嚟講去都係得一度板斧，就係稅基狹窄，佢認為若果條件許可，稅基梗係闊好過窄啦，但冇人話稅基窄就一定係壞事噃！數口精甩尾嘅朗尼仲同政府計數，話政府驚稅基窄會令稅收唔穩定，但唔好唔記得香港大把儲備，正係為咗不時之需。佢仲話自己係「付稅一族」，恒隆集團每年亦進貢唔少畀庫房，不過就畀得相當happy，因為《基本法》講明要維持低稅率。
評級機構係叠眼老虎
朗尼又話不斷吹水話稅基窄嘅人，不外乎係啲評級機構，佢哋正一係「叠眼老虎」，睇嘢唔夠全面，以為拓闊稅基放諸四海皆準，「若果你畀佢呢一套套喺你個頭，咁就真係儍喇。」佢仲提醒香港揸fit人，最緊要穩定繁榮，唔係搞到個個上街就麻煩。
講到興起，朗尼仲話：「低收入階層賺得少，生活困難，應該唔使畀稅噃！」試問有幾多有錢佬會講啲咁「動聽」嘅說話吖，所以華華今次就封咗朗尼做偶像。