靚女V今個星期去曼谷旅行，下個星期到靚女W去，再下一個星期賓架N太太又話去，乜曼谷咁受歡迎呢？聽靚女V講：去開就有癮，曼谷有兩度好，酒店平，骨平，平之餘，更加服務一流，得閒去輕鬆吓，唔知幾爽。平成點？港紙三千七百幾就可以連機票入住半島酒店三晚，酒店有艇送人客過河，小艇碼頭就喺高架鐵路旁邊，去高檔商場如Emporium、CentralChidlom、SiamSquare、素坤逸路一帶，完全唔怕塞車。與倫敦酒店比較，住假日酒店（羅素廣場），近地鐵站，普通房，全無設施，都要成三百美元啦。靚女W去曼谷去到慣，最鍾意去Spa與做泰式按摩，視之為減壓妙藥。
至於賓架N太太，就聽到人講陳智思議員家族開設嘅醫院差唔多等於五星酒店，全套驗身特別便宜（與香港私家醫院比較），譬如在一家香港醫院做核磁共振檢驗心臟，要萬幾銀港幣，陳家醫院就收萬幾銖，等於港幣三千幾咋。N太聽到前個周末，陳議員陪周一嶽局長去曼谷參觀醫院，唔知係唔係想觀摩吓，返嚟將香港搞成中國醫護中心呢？
左丁山問N太：「你唔識泰文噃，用英文睇病似乎唔多慣，點樣同泰國醫生溝通呀！」N太話：「我就係去探吓路先，賓架C太太話醫院有多種語言繙譯，英文、潮州話、粵語、普通話、越南話、馬拉話、阿拉伯話，一應俱全。我去仄過之後，如果有好印象，就拉埋老公一齊過去做全身檢查，連埋住半島酒店加機票再食魚翅燕窩，都抵過喺香港私家醫院做！」
聽到左丁山心都郁，一於等N太返嚟，問清楚先。賓架C講，陳家賣咗亞洲商業銀行，以後可能集中資金，擴大投資喺亞洲保險與呢間醫院，不排除到中國大陸開設同類新醫院。Healthcare（醫護）係未來亞洲嘅大生意，香港中小型銀行則爭到頭崩額裂，陳智思家族毅然將家族生意轉型，有啲似肥佬黎當年放棄紡織成衣而進軍傳媒，策略就啱嘞，是否成功就要睇執行（execution）咯。