周中主要戲碼來自英超聯及歐冠盃外圍賽，以重要性，以歐冠盃外圍賽為甚，邊隊打埋今場可以順利晉級，立即可以角逐歐冠盃分組賽，獎金好和味。
星期二睇中兩隊打歐冠盃客軍，漢堡首回合未能擊敗奧沙辛拿，今仗作客唔值得秤高；不過漢堡踢咗兩場德甲，叫做唔使輸，連埋歐冠盃，算係3場不敗；西甲未開咧，奧沙辛拿狀態始終唔夠銳，加上歐洲賽經驗輸蝕；漢堡受讓平/半，博得過。
雷丁受讓唔買走雞
華倫西亞預料係今晚其中一支最擔飛球隊，講真首回合落後0:1，今仗返主場仲唔搏，真係等打歐協盃咩。但主勝只得1.35倍，折算亞洲盤計讓到一球/球半，講真，從西班牙友賽冰島的表現，華倫當家射手韋拿，仍然處於調整期，狀態未上番。
蘋果波神之前已經講過，薩爾斯堡呢支奧地利球隊，絕對唔係善男信女，呢場亞洲盤下盤認真博得過。但馬會只開讓球主客和，就博「和局」，希望主隊小勝1粒啦。
周三英超推介雷丁，維拉上仗喺阿仙奴身上搶1分，但攻力並唔好，只係一次死球戰術入波，雷丁有鬥志，上仗落後米堡2球，都可反勝，受讓半球博下盤。富咸大敗予曼聯，回師主場先係搵食地方，保頓過去作客倫敦都冇咩好結果，平手揀富咸啦。文：牽牛