啤牌J代表王子，正好配合今日介紹嘅王子菜。有食肆自稱花幾個月時間搜集資料，仲去埋歐洲考察，根據歷史上各國各朝各代王子生活習慣、喜好等炮製出5款王子菜，男生食完會唔會變王子就唔知，不過食完同上一堂歷史課無分別，自問西史誇啦啦，就試試可唔可以單靠菜名同形容，估出邊個王子食邊道王子菜？
記者︰方綺君
攝影︰陳盛臣
王子
a.哈布斯堡王室魯道夫一世
b.英國愛德華七世
c.西班牙查理一世國王
d.瑞典瓦薩王子
e.蒙古忽必烈
王子菜
1.大汗烤羊$78
貼士：有大汗兩字，唔識答無話可說。切件小羊放入大鍋，逐一放入燒紅嘅石頭，順序一層石頭一層肉，再加入紅蘿蔔、馬鈴薯直至塞滿為止，最後冚蓋將羊燜熟，上碟羊肉依然鮮嫩多汁。
2.國王焗飯$88
貼士：當時王室大力支持航海業，並將各地香料引入菜餚，王子勁Buy。番紅花做香料，豬肉腸做炒飯底，用青口、三文魚、鱲魚、虎蝦鋪飯面，再加地中海橄欖油，色香味俱全。
3.香草熏蹄$72
貼士：王子經常出征，因煙熏可使肉類儲存更久，所以特別鍾情此菜帶上沙場享用。沿用古式火煙煮法，配迷迭香、羅勒、百里香等香草，拌芒果芝士醬、苦瓜醬同番茄沙沙3種醬料食用。
4.烤燒鹿扒$178
貼士：貴族鍾意打獵，將獵獲嘅野味變成美味食材。追尋歷史，大廚跟足當時製法，明火烤燒鹿肉，用火嘅高溫即時將肉汁鎖住，5成熟嘅鹿扒用紅酒醃足1日，肉嫩多汁，難怪王子都讚好。
5.貴族三文治$68
貼士：當時王室貴族欣賞傳統點心，大廚先有靈感創出呢道菜。除三文治外，更特別加入迷你漢堡同迷你熱狗，再配精緻田園沙律，確係炎炎夏日上佳之選。
答案
1配e
蒙古忽必烈係當時蒙古族第四王子，其後成為第五代蒙古大汗。1271年，忽必烈改國號為大元，正式即位為皇帝，蒙古人最Buy羊肉，忽必烈都唔例外。
2配c
西班牙查理一世國王，即位3年後就當上神聖羅馬帝國皇帝，擁有西班牙以至奧地利、普魯士、尼德蘭（即今日比利時、盧森堡）等歐洲廣大地區，最Buy焗飯。
3配d
瓦薩王子係瑞典歷史中一位舉足輕重嘅王子，高大英俊做事果斷，21歲率領大軍用3年時間打敗丹麥，即位國王，建立影響後世深遠的瓦薩王朝，最Buy熏蹄。
4配a
魯道夫一世係哈布斯堡王室第四個兒子，於1278年征服波希米亞，成為德意志國王，為王朝奠定強盛基礎，最鍾意打獵，最Buy野味。
5配b
英國愛德華七世，係維多利亞女王同哥達艾伯特親王嘅長子，為人和藹可親，懂得享受生活，佢最Buy各式三文治。
店舖裝飾似皇宮
王子菜，係咪可以細味到王族飲食？開頭我亦半信半疑，曾經懷疑過資料可信性，問「王子冰室」負責人點搵資料，答案係：「上網同去圖書館搜集資料，老闆同大廚更加親自飛去歐洲睇過，去過唔同地方試當地菜式，再因應香港人口味改良番少少……」聽落又真係幾有Heart。拍攝當日，餐廳新裝修，裝修布置好似歐洲皇宮，歐洲王族素來鍾意打獵，冰室設計貫徹呢個特色，牆上掛咗幾個熊頭、鹿頭做裝飾，地下鋪假草地氈，絕不馬虎，置身呢間咁有貴族氣派嘅餐廳食精選王子套餐，講真唔理資料真定假都夠氣派啦，何況啲菜式又真係唔曳。
古德明：真有其人！
一收餐廳隊畀我嘅菜單，我起初都半信半懷疑，懷疑歷史到底是否真有其人，本住記者事事求證精神，致電對西方歷史有深入研究嘅古德明先生請教，佢話︰「歷史上真有其人，不過故事同日常生活習慣等等事迹，翻查起碼都要1日喎。」古先生事忙，唔能夠替我翻查，不過至少知道確有其人，其他古仔嘅真確性我已經懶理，老實講句有好嘢食就得啦。
食客有Say
搵食攻略
王子冰室（31881010）
地址 ：灣仔謝斐道303號王子酒店地下
營業時間 ：12:00nn-3:00am
座位 ：200個
