噚日，孫柏文同一班舊同事分析員食晏，敍敍舊，順便收收風。橫掂呢排個股市忽高忽低，就連我推介嘅恒指熊證6204，都因為升過回收價17500點，去到17506點而被回收，所以去聽吓班舊同事有乜嘢講都好。因為佢哋覆蓋嘅行業五花八門，所以每次同班分析員敍舊，都有機會聽到各行各業分析員嘅獨特觀點與角度。加上佢哋個個分析力強，我每次去都有如參加日本漫畫《龍珠》裏面嘅「天下武林大會」一樣，用分析力做格鬥。
噚日敍舊亦都不負所託，令我獲益良多。原來，佢哋都被當今世上最大「疑團」（conundrum）困擾。大家可能會問：「孫柏文，你啲舊同事一定好似你咁，眼見美國債券市場發出『冇通脹』訊號，但同時原材料市場又發出『有通脹』訊號，所以睇唔穿究竟美國有冇通脹，而被呢個疑團困擾，係唔係？」
其實，佢哋係被一個更大嘅疑團困擾，佢哋都有諗過呢個疑團，不過總係猜不透答案，噚日就攞出來一齊分析。呢個疑團係：點解當我哋特區正係一個「盲目崇拜女人要瘦，最好瘦到有厭食症咁瘦」嘅社會時，TVB女藝員胡杏兒同肥肥個女欣宜，呢排都「大件咗好多」嘅情況下，輿論對「肥杏」嘅態度比起欣宜好咁多。
兩股前景有別
首先睇牌面，如果一個女人好瘦，就等於一間上市公司好賺錢一樣，咁佢哋兩個，近排都有「盈利倒退」嘅情況出現。首先講欣宜，其實佢第一次由200幾磅減到剩番130幾磅時，都得到廣大市民支持（包括我在內）。起碼，「祝你娶欣宜」再唔會被低B小學生用來互相詛咒，所以如果支持度係股價，「欣宜」呢隻股都算升過好多。
胡杏兒更加唔需要講，市民對佢嘅支持度，一路都咁高。就算呢排肥咗，輿論都好親切咁稱她為「肥杏」，情況有如前港督彭定康同埋特區首長董建華一樣，一個被稱為「肥彭」，另一個被叫「特區首長董建華」。
大家可能會問：「咁點解兩個近排都『盈利倒退』，不過一個就股價大瀉，另一個就股價維持喺高水平呢？」其實，如果用股票分析方法來分析，呢個情況非常易明。支持一個藝人，就如買佢嘅股票一樣，而股價除咗反映今期有冇着數之外（股票：派息＝女星：有靚相睇），當然也反映市場預期該間公司嘅未來走勢。
而欣宜股價倒退嘅最大原因，係因為「市場」對佢嘅未來走勢不感樂觀。喺娛樂界工作嘅「分析員」，對欣宜嘅管理手法極度不滿，給人印象好似當年個啲dotcom一樣，完全冇節制。出現「盈利倒退」，代表管理手法出現結構性問題。間公司有咁嘅前景，又點會有「分析員」、「基金經理」、「財經口水佬」支持揸佢隻股？
胡杏兒就啱啱相反，今次佢「盈利倒退」，就好似一間好有信心投資，同時又非常進取嘅會計策略，將固定資產投資快速貶值嘅公司，令到一眾「分析員」覺得「盈利倒退」只係短暫性現象，甚至覺得今次係因大膽投資而「特登」出現「盈利倒退」。所以，若然他朝出現更高嘅盈利，只令「分析員」如癡如醉。當然，胡杏兒已經俾市場預期佢會快速減磅，如果佢做唔到，「股價」分分鐘會跌得多過欣宜。欣宜其實亦都可以救自己嗰市，只要佢可以收身成功，引入具有畢菲特叫座力嘅投資者支持（例如有BradPitt追求），咁就會翻身成功。
不過最後，我希望為大家點一隻歌，就係花旗國女歌手ChristinaAguilera嘅《Beautiful》。自己下載聽聽啦！
孫柏文