港股噚日反彈，大升榜首位係建星環保（8011），1日之內，大升35.8%，以高位0.55元收市，成交亦大增到2251萬股，創出上市後新高。
今個月初，推介建星，當時股價0.375元，唔夠1個月，升幅46%，噚日見佢有勢，再作提點，早市0.43元樓下，任你買，即日鮮都有30%利潤落袋。𠵱家點做，當然係以上移止賺位策略，賺到佢盡，分分鐘獲利可以倍計。
股價反映供求，有升有跌，有大升亦有大跌，捉對路，就要一直讓利潤向前跑，賺盡，一鋪就乜仇都報晒；如果上錯賊車，就一定要止蝕，跌價10%就離場，以後再跌即使跌好多，都完全同你無關。唔嚴守止蝕，冇得怨人，亦冇機會在股市生存。
收料係我哋嘅強項，但有時候，收料收得早，未必好。在此又翻舊賬，記得6月中之時，已經推介建星，當時股價0.47元，話明股價調整時可以收集，點知買咗之後要嗱嗱聲止蝕，其後股價仲跌到0.34元先反彈，跟住在低位「漚」咗個幾月，到近日先再發動攻勢。今次呢個升浪，終於捉到正。
聯康可再發力
另1隻已發力，但仍然可以再發力嘅消息股，就係聯康生物科技（690）。7月中初作推介，當時股價2.70元，8月初升上4.46元，升幅65%，之後出現調整，落番3.50元，形成上升三角形，噚日收3.87元，升5.1%，已破位而上，初步上升目標指向5字頭。
聯康噚日破位上，但成交只18萬股，唔配合。不過，聯康係超級冷門股，平日成交亦唔係好多，點解？因為貨源盡在強者手中，好惜售，佢哋當聯康係寶，我哋冇理由當佢係草，一於上移止賺位，食鋪勁嘅。
國企突然轉強勢，H指重上7000大關，大升108點，呢輪全面睇好內地地產股，中國海外（688）業績對辦，高收5.30元，升咗6.4%；華潤置地（1109）亦有2.7%進賬，越秀投資（123）則升2仙。
上禮拜推介越投，係基於佢係內地大型房產股，同時亦係收到料，話芬佬遲早會砌佢上去，升幅仲會係以倍計。其實，以越投嘅每股資產實值成3.34元計，現價真係好抵買，不過，佢嘅特性係慢熱，要有好好耐性，先可以搵到佢大錢。
郭兆誠