自從7月尾，內地最大電器零售商國美，成功使出一招離間計，唔單止拆散咗早有婚約嘅永樂同大中，轉頭仲將永樂娶埋入門，激到失戀嘅大中，扣住1.5億人仔禮金唔肯放，最近仲公開招親，拋出基本身價30億人仔，用實際行動，證明畀舊情人睇，活得比你好。
雖則話公開招親，但大中老闆張大中就好老實，話心儀對象有三個，最鍾情嘅就係業界阿二蘇寧，其次係老外百思買，最後先會考慮國美。梗係，國美同佢哋不嬲都係競爭對手，加上對方橫刀奪愛，新愁舊恨，唔到最後關頭，都唔會揀佢喇！
既然有心儀對象，大中呢邊實行大送秋波，主動向蘇寧示好，但另一邊嘅蘇寧就怕醜啲，話任何收購舉動，都要先經中國政監會點頭批准，先至可以對外公布，跟足規矩行事，非常乖仔。
兩家人咁低調行事，除咗係法規所限之外，亦因為大中同永樂之間嘅1.5億禮金瓜葛，咁大中一日未搞掂之前嘅爛攤子，要食第二家茶禮，睇怕仲有相當難度。