恒指前日大散，昨日差不多收番一半失地。中移動（941）、中海油（883）與滙控（005），總共拉高恒指79點，為恒指升幅貢獻5成半。
短期個市都仲係未得住，以200點做上落波幅，有平貨則執啲C輪，細細注，玩上落遊戲。
中電信C輪4981：中電信（728）收2.73元，跌1格。前周四失驚無神踢上2.90元，冇嘢跟尾，升得急當然會先行回吐，到咗現價，又可以博佢彈番上幾格，買C輪賺番多少。
正路之選，係4981。隻輪11月杪夠鐘，輪價23.7仙，溢價3.9%，槓桿率11.5倍（有效7.9倍），引伸波幅27.2%。
思捷C輪2166：思捷（330）連升6日，進賬7.30元後，昨首日回吐0.80元，收64.15元。現價仍然超買，估計仲會有調整，吼住回到挨近63元嗰頭，買C輪，冇幾多好揀，要隻2166。隻輪12月初到期，輪價68仙，溢價2.4%，槓桿率9.4倍（有效7倍），引伸波幅27%。
國泰C輪3555：油價升，國泰（293）跌2仙，收14.28元。C輪3555跌到四腳朝天，收15.1仙，跌幅25%。到9月尾之時，正股如果同𠵱家一樣，隻輪作廢。正股升0.25元，則揸隻輪冇賺冇蝕。正股升0.40元，揸隻輪賺1倍。正股升5%，發達咯，隻輪升3倍。隻輪大生大死，唔會定響度。
章盛