美股上禮拜連升5日，隨時調整，港股行先一步，跌定先，1日之內，就大跌322點，險守17000大關。港股在創出今年新高後，已預期會借中國加息的不利因素而調整，但1日就跌得咁急，大戶要推低個市，真係絕不手軟。
上禮拜五先話過，今個禮拜開始，滙控（005）有大批C輪到期計價，數量成6至7億份（相當正股6至7千萬股），滙控肯定俾人係咁掟，好似噚日滙控跌1.60元，涉及C輪嘅金額就少咗成億元，你估大戶唔使搵錢咩？
恒指1日之內跌穿10日線同20日線，初步形勢已轉壞，但由於股市受對沖活動影響嘅程度愈來愈大，大上大落，好敏感，跌穿兩條短期平均線，唔代表乜嘢。上月中，恒指收16065，連50日線都穿埋，其後咪大幅上升成1500點。港股短期只要能守得穩在16800之上，隨時都有轉好可能。
建星環保（8011）逆市而升，收0.405元，升2仙，升幅5.2%。今個月初推介時係0.375元，話佢調整完成，會再發力，初步目標係6月高位0.495元，家吓睇勢，成功機會幾大。
建星已向採油業轉型，早輪已收到料，話今個月會有好消息，最新嘅料係下禮拜會有大動作，而兩個石油業嘅大孖沙會有可能同佢達成某種程度嘅合作關係，若消息屬實，建星未來股價升幅有機會以倍計。
世紀陽光（8276）中期業績有強勁增長，預期明後年增勢會更凌厲，現時上車，揸一兩年，有機會賺5成。
現價買有機賺5成
06年（12月年結）的上半年，營業額1.33億元（人民幣．下同），升111%；獲利4836萬元，升136%；每股盈利12.1仙，中期息派2港仙，今年首季，營業額4982萬元，獲利1703萬元。
集團5種主要有機肥產品銷售增長理想，其中兩種有機肥售價由5月開始平均提升12%及15%，令收入大增，估計全年盈利1.1億元。07年開始，雲霄新廠投產，盈利可上升至2.1億元，08年更可增至3.1億元，屆時年產量達55.5萬噸，係現有產能的3.6倍，可穩站中國有機肥料業的領導地位。
郭兆誠