香港足球代表隊上星期喺亞洲盃外圍賽，作客2:2迫和烏茲別克，出線重現曙光；不過，呢場波就連累到烏軍教練，俾當地聯賽冠軍棉農炒魷。
湼波喺上季中超未能帶領申花奪冠，季尾就接手烏茲別克班霸棉農。由於烏茲別克國家隊基本上以棉農球員為骨幹，順理成章下佢同時兼任國家隊主帥一職。現年62歲嘅湼波同烏茲別克簽約4年，目標係帶領球隊進軍2010年世界盃決賽周，而全國人民亦對佢寄予厚望。
9月6日訪港戰矚目
帶領國家隊出戰亞洲盃外圍賽前，湼波領導嘅棉農喺聯賽取得一場9:1嘅大捷，目前19戰過後積分優勢擴大至9分，基本上鎖定今季聯賽冠軍。不過，湼波喺亞冠盃成績差強人意，棉農8強止步。
據亞洲足協報道，湼波落台嘅導火線，出現喺一場原本不受重視嘅國家隊比賽，即上星期三主場對香港嘅亞洲盃外圍賽。烏茲別克上半場兩球領先大好形勢，竟然俾香港小將沈國強連追兩球迫和，3戰後同香港一樣得4分，落後榜首嘅卡塔爾有5分之多。下場外圍賽9月6日輪到香港主場迎戰烏茲別克，俾港隊打爛咗半個飯碗嘅湼波，到時又睇吓佢另外半個飯碗保唔保得住先。
「雖然港隊一向冇主場優勢，但今次難得有機會爭出線，我求驗客希望呼籲大家，9月6日一齊到大球場撐場，順便睇埋湼波可能係最後一場嘅執教啦。」