每年學期結束，校方常會安排家長回校購買教科書，但有讀者不滿校方收錢後，卻收到不足一半書，要遲至新學年開學才可領齊書。
讀者高小姐投訴，其子女就讀的學校購書安排欠妥。她說：「荔枝角天主教小學喺七月中時，叫我哋啲家長返學校，買定新學年嘅書，一次過要畀成差唔多1,300蚊，但攞到返屋企嘅就唔夠20本書，總值不超過600蚊。有乜理由書都畀唔到我哋，就要預繳定成700幾蚊喎！既然唔齊書，就應該等到開學前兩三個禮拜一次過買！」
購外國課本先付款
荔枝角天主教小學黃校長稱，因來年轉用新教材，致未能一次過完成購書。他說：「學校6月先揀定下年用乜嘢書，英文科更會改用外國讀本取代傳統課本，需向外國訂書，因係第一次，欠缺經驗而有誤會。因委託書商去外國訂書，故要先畀錢，中文書又係新課程，要轉版，書商需要通過預訂嚟掌握印數，所以都要先付款。」
有關轉用新課本，已在家長會通過。黃校長說：「6月開家長會嗰陣，已經通過用新書，同埋知會出席者，要同外國訂，可能會遲啲先齊書，校方已經發信通知家長，出席家長會，所以以為大家都知道呢個安排。而過去一直都喺學期尾訂書，方便家長可以預先了解新學期課程內容。書單又有寫明，大家可以自行購買，並非一定要通過校方。賣書當日，書商都寫明部份書要先訂購後印刷，需要開學先攞到！所以係有充份解釋，家長亦有選擇權。」
檔案編號：0715040