英超首輪賽畢，相信很多波友都有先苦後甜之感，不過我之前講過直播波有時勢均力敵或名牌隊被捧至賠率如雞肋，未必係理想嘅博彩場次；反而埋首其他賽事可能會有更理性嘅分析，而不會一面倒為求攻得過癮，傾注買直播強隊。講到理性投注，今日想研究吓隔籬埠澳門彩票嘅開盤策略。
喺香港賭波，當然只有足智彩一家係合法莊家；但大家要知道每間具規模嘅博彩公司，內裏必有一些專家，所謂開盤手或者精算師，去結合軍情以研究每場比賽開盤嘅策略同賠率；就我所知馬會裏嘅精算師，月薪就逾十萬港元以上，所以信莊家開盤確有道理，當然不要像公仔箱嗰啲所謂盤路專家，逢見英國公司嗰邊啲波落飛，都話有計要捧場咁盲目啦。
齋開主客和減少損失
說回正題，雖然好多人話足智彩開盤策略嫌保守，但我發覺澳彩今屆季初仲厲害，總會避開一啲令佢哋損手嘅場次；好似我之前品題過嘅奧甲班霸薩爾斯堡，上周六主場對前列嘅馬特斯堡，已經唔開亞洲盤，齋畀你賭主客和1.35倍Ｗ，結果薩軍贏2:0，如果好似其他海外莊家開出讓一球/球半高水，咁就損失慘重。另外，佢哋荷蘭波上周六開出阿爾克馬爾讓一球/球半，結果阿軍大炒對手8:1；但翌日阿積士同燕豪芬大勝，佢哋就唔開亞洲盤，大家見咁嘅情況，要識走位倒轉買足智彩嘅讓球主客和，捧吓大熱「主」、「客」勝或攻波膽。
另提，近期表現神勇嘅華度兄攻英聯盃，實在相當明智，不過要提醒大家，賭英聯盃至緊要睇臨場陣容，英冠隊肯出強陣爭盃仔恰次級球隊，捧場注碼可以酌量加大。
文：蘋果波神