今季英超聯早幾日啱啱先開鑼，之不過07至2010年嘅轉播權，就快又要開盤，事關有線嗰一紙三年合約，就嚟到期，咁十個上台客，九個都係為睇波，所以即使用到億億聲去買，一眾收費電視都唔會手軟，爭唔到都要扯高個價，等對手爭到都冇啖好食。
有線想續約係人都知，華華只係估唔到，TVB收費電視出手會快過向來積極進取嘅now，噚日公布加入競投，講明係想吸納球迷，增加上客量。
冇咗小小超支大水喉射住，now近排確實靜咗唔少，不過諗深一層，now新主番薯梁數口咁精，點都會諗過度過，話晒佢哋同TVB收費電視關係唔錯，一旦對方中咗標，大家都仲可以傾吓合作，一齊播英超，咁到時條數就易計好多，睇嚟吳天海真係有排煩。