中信泰富早排俾穆迪同標普將信貸評級降為垃圾級，股價受壓，名利雙失。原因係兩個評級機構嫌佢賣完半個又一城後，又再賣出國泰航空股權，將資金調番大陸，重錘投資在周期波動大嘅業務上，令人擔心業績會好大上落。
呢件事發生時，搵唔到榮太子智健comment，噚日咁啱佢哋開股東特別大會（華華聽講會後有燕窩招待，咁睇嚟對股東都算幾好），中信泰富同時公布中期業績，咁華華同一眾行家梗係順便走一轉問吓太子點睇啦。
咪阻住條路
點知一提起中信泰富俾人降落垃圾級，太子面色一沉，其他問題都撥開唔答住，點都要答咗呢條先。佢話喺八九十年代（指上世紀啦），啲香港上市公司將工廠搬去內地時，亦遭人降級對待，但𠵱家睇番，如果當日冇咁做，今日仲點樣做生意？
「Moody有Moody去評級，我哋有我哋嘅睇法，以地產嚟講，香港有幾多投資機會吖？我哋要搵我哋嘅路，而中國，中信泰富比較熟悉，所以投資喺中國增加土地儲備。」所謂唔熟唔做，自己地頭一定着數啲，榮太子咁講亦有道理。佢仲好有信心假以時日，中國房地產將會為中信泰富提供一個積極嘅貢獻；「呢個係一個好明白嘅問題，唔使再多講！」真係有性格。
李華華