中國為防經濟過熱終於加息，香港股市前日借勢調整一日，噚日已經升番上萬七。呢個反應同大家對宏調成效嘅睇法好接近，即係打擊唔係冇，但轉頭又癲過。即如內地樓市，中央三番四次出招壓抑，又話限制外資炒賣，又話唔再批屋地，啲中資地產股依然有人炒。
講一個實地觀察畀各位參考。去年中北京三環路外啲樓（一環買唔到、二環亦幾貴），大約六七百蚊（折為港紙計）一呎。一個千呎新盤，六七十萬有交易。呢啲樓除咗管理較差之外，質素同香港一般私人樓冇乜分別，華華睇咗幾間都心郁郁。一年下來，樓價升咗三成，如果睇長線，如果通脹加劇，如果人民幣升值，呢啲樓仍係吸引嘅投資。
咁驚唔驚硬着陸呢？華華只可以講，識得嘅地產界中資界之中，冇人信宏調政策真係推得冧個市；有賣內地樓嘅朋友話，現時限制供應，咁遲啲咪更少貨？佢哋直頭認為樓市調整係最好入貨機會。
過去十年，內地經濟真係奇迹咁好景。增長高速，通脹低企（上半年消費物價指數僅升1.3%，當中肉價跌7.7%，蛋價跌10.9%），外資源源不斷流入，冇人再提下崗問題，最頭痛嘅可能就係美國佬成日迫人民幣升值。
大城市居民購買力日增，咁要改善生活，買樓係必然選擇，情況一如六七十年代香港，只要唔用行政手段，加少少息，未使驚住。
李華華