唔好畀「季初波，下盤多」呢啲冇乜根據嘅「賭仔姓賴」理論所誤，今周中展開嘅英格蘭聯賽盃，其實幾好賭；當中修咸頓有主場之利，今季又多攻擊好手加盟，對住嘅只係英甲聯球隊伊奧維，「修頓」「主勝」可靠。冷選可吼另一有3.75倍分頭嘅主隊貝利，望本欄乘勝追擊。文：華度
被球迷暱稱作「修頓」嘅修咸頓，今季季前組軍行動積極，積極在係咁搵啲有番咁上下級數嘅攻擊好手返嚟，好似曾效力熱刺嘅波蘭籍高大前鋒拉斯亞克、前曼城前鋒兼一代射手伊恩胡禮嘅養子巴利胡禮菲臘斯、同埋被譽為該會今夏最重要收購嘅前赫斯捷克籍中場史卡素。以上鋒將全部都具備喺頂級聯賽比賽經驗，咁都不特止，領隊佐治貝利果然係有料之人，同時間亦懂得強化球隊其餘位置實力，又搵嚟新特蘭正選守門員奇雲戴維斯、同球王比利同名嘅葡萄牙籍守將貝尼（Pele）等。
伊奧維料子有限聽劏
呢隊「修頓」，睇嚟今季唔再好似上季咁喺英冠聯中游浮浮沉沉，以佢哋開季聯賽4戰得到1勝3和不敗嘅成績，來季真係隨時見到佢哋喺英超聯出現。
今周中「修頓」唔打聯賽，轉攻聯賽盃，所遇對手只係英甲聯球隊伊奧維，對住低一個組別嘅對手，加埋主場之利，相信仲易食。
伊奧維呢班波，相信都唔係太多香港球迷對佢哋有所認識，過往甚至可能一年入面，只有足總盃比賽至聽到一次半次佢哋個大名；查實佢哋前季至喺英乙升上英甲，多年來都只係喺英格蘭幾個最低級別聯賽浮沉，真正料子有限。比起叫做踢咗多年英超聯嘅修咸頓，自然差咗幾班。
兩軍都啱啱喺上周末踢過聯賽，同樣作客出戰，結果修咸頓喺英冠聯，正選陣容收起咗主力史卡素之下，仍然可以從後趕上迫和班士利2:2，士氣唔錯；相反伊奧維就喺英甲聯作客燦美爾由頭輸到尾。今仗亦即係伊奧維喺4日內連續踢嘅第2場作客波，亦都好蝕底。所以，呢場波大可以放開懷抱，向個「讓球主客和」「主勝」埋手，博修咸頓大炒對手，贏到兩球或以上。
貝利3.75倍冷W博得過
今次冷門推介就搵今晚（周二）開波嘅另一場聯賽盃，貝利主場對新特蘭，博貝利開主Ｗ。新特蘭今季易手咗畀名宿昆尼，但畀昆尼搞兩搞，球隊成績不進反退，睇嚟新特蘭喺昆尼帶領下，都係冇乜好結果。呢支英格蘭東北部球隊，一離開佢哋個光明球場主場，更加無料到，所以今仗即使挾住英冠聯球隊「威名」，作客鬥英乙聯分子貝利，都唔好咁信賴。貝利雖然近況都唔算好，開季聯賽4戰全負，但今仗有3.75倍Ｗ，勝在有值博率。
投資特攻隊金句
「唔好畀『季初波，下盤多』呢啲冇根據嘅理論所誤，今周中『修頓』轉攻聯賽盃，主場對住低一個組別對手，相信仲易食。」