王喜舊年多數喺內地做嘢，不過呢排馮仁昭好幾次都喺九龍塘界限街撞到佢跑步。原來王喜幾個月前由何文田加多利山過千呎單位，搬到月租約三萬蚊嘅九龍塘巴芬道新居。
馮仁昭聽聞加多利山雖然係圈中人風水地，但有相士講過嗰度嘅地運只係行到今年尾，加上業主打算賣樓，所以係時候搬竇，搵到呢間被風水佬指稱旺佢嘅1,300呎風水屋，篤信密宗嘅王喜仲喺露台掛咗寓意平安嘅西藏風馬旗，仲喺新居露台燒驅蚊僻邪嘅艾草。
晾衫洗碗一腳踢
上個星期五晚，王喜一條冷喺新屋玩煮飯仔，見佢喺廚房又洗煲又抹碗，再走去露台晾衫，熟練程度同師奶有得揮。其間佢見到有記者影相，仲即刻做出鬼馬勝利手勢㖭。做完家務，着住背心同短褲嘅王喜如常落街跑步，跑足20分鐘至返歸。
呢期王喜回流返港，搬竇後適逢主演劇集《CIB刑事情報科》推出，上周首播收視達31點，即係有接近200萬觀眾捧場，成績算係唔錯，唔知呢樣又同佢搬風水屋有冇關係呢？
