在XocatII討論區內，最近新增了一則有關銀行實施5天結算的笑話。
散客上門 雞同鴨講
普通版：市民見有空檔，銀行星期日又開門，入去……
市民：唔該，我想轉錢。
職員：先生唔好意思，今日我哋幫唔到你「轉錢」。
市民：你開門有咩理由無錢轉呀？
職員：唔好意思，𠵱家5天結算，所以星期日轉唔到錢。
市民：咁我想「做張定期」，得嘛？
職員：唔好意思，今日唔可以幫你做。
市民：你開門有咩理由無定期做呀？
職員：唔好意思，𠵱家5天結算，所以星期日做唔到定期。
市民：咩都唔做得，咁你哋開嚟做乜？
職員：我哋有專業嘅同事可以介紹啲儲錢計劃畀你，又可以為你提供市場資訊，例如有咩市場基金可以買。仲有你可以申請我哋嘅creditcard。
市民：好，我都啱啱想「買中國基金」，你幫我落order啦。
職員：唔好意思呀，今日唔可以幫你買基金。
市民：點解又唔得呀？
職員：唔好意思，𠵱家5天結算，所以星期日轉唔到美金；而且星期日無市，所以買唔到基金。
市民：都唔明你哋星期日咩都唔得，開嚟做乜？算喇，我要closeaccount，你幫我「打張本票」！
職員：唔好意思，𠵱家5天結算，所以星期日做唔到本票。
市民：……
賊佬光顧 都冇面畀
特別版：銀行開7日，其實係方便賊佬
賊人：打－打－打－劫－
職員：先生，對唔住，今日星期日無人開夾萬，請你聽日再嚟過；仲有冇其他幫到你……阿腥，其實做賊都好危險㗎嗬，不如你買番份保險先啦，我可以介紹畀你。
賊人：你唔好呃我唔識嘢呀？做犯法嘢唔受保㗎喎！叫你經理出來，我要complain！
職員：先生，對唔住，今日星期日無經理當值，不如你星期一先再嚟complain過！
銀行開門 櫃位休息
記者：笑話普通版括號內的銀行服務，例如轉賬、外滙買賣、做定期（網上渠道以外）、開本票等，基本上要透過分行櫃位進行，早前宣布分行將會於星期日開業的銀行，全部強調只會提供財富管理、信用卡或貸款申請等服務，而不會提供櫃位服務。
事實上，根據本港的《銀行業條例》的釋義規定，工作日（workingday）指不屬於公眾假日或烈風警告日的任何日子。即使在5天結算實行前，本港銀行一向亦不會於星期日或公眾假日提供櫃位服務，因此，銀行於星期日沒有櫃位服務，其實與5天結算並無直接關係。
滙豐發言人說，星期日提供財富管理服務的10家分行，只會記錄客戶的交易指示，待市場於交易日運作時，才會執行指示；即使購買禮券、使用保管箱等服務，毋須涉及櫃位交易，但該行亦不會提供。