今日有段新聞，幫孫柏文勾起咗唔少回憶。呢段新聞就係有關濠賭股熱潮當中，最「神話」嘅959奧瑪仕。而呢段新聞對讀緊MBA同埋讀緊finance嘅朋友，真係好好嘅casestudy。
奧瑪仕段新聞，係講話佢哋又有人攞張「可換股票據」去換股票。換股人只要攞張可換股票據加20萬港元，就可以換取相等於奧瑪仕喺換股嗰一刻，5%嘅股權。如果換股嘅一刻，奧瑪仕總股數量有10000股，攞張可換股票據加20萬港元，就可以換500股。如果同一日換兩張，第一張可以換500股，第二張就可以換10500股嘅5%，即係525股，總股數真係幾何咁上。
大家如果攞噚日奧瑪仕嘅公司通告，淨係睇吓個股數郁動表，就會睇到股數係由7千幾萬股，升至噚日嘅53億股。真係好勁！當然，如果你話總股數上升係因公司將股票拆細，以前每揸一股，今日就揸75股，我都會無話可說，不過奧瑪仕發嘅新股就唔係因拆細而上，而係畀咗人。
呢啲可換股票據，係喺2004年3月31日，當奧瑪仕仲係間一沉百踩電子公司嘅時候發出。一發就發72張，如果可換股票據全數行使，奧瑪仕嘅股本就擴大33倍（股本x1.05^72）。當然，由發出可換股票據嗰日到今天，奧瑪仕嘅股本擴大咗唔止33倍，因為佢哋有試過一次以一股送一股當派發股息，又要發幾億股去「換」位於澳門「希臘神話賭場」嘅股份，不過總股數上升嘅最大理由就一定係呢啲可換股票據。
大家可能會問：「點解有人去奧瑪仕換股，係一個好好嘅casestudy？」問得好！原因奧瑪仕嘅可換股票據，由決定發出到被人換股都係企業融資嘅「巔峯之作」。首先，每一次有人換股，佢換來嘅股數就會啱啱低過要公布總股數嘅5%（500股/10500股=4.76%），所以只要一張一張咁換，就可以神不知鬼不覺。
證明特區財技幾咁高
而持票據嘅人，開始嘅時候的確以非常低調嘅姿態換股。不過，正當奧瑪仕成功變身為一間豪賭概念股嘅時候，港交所對佢哋披露出通告嘅要求就忽然高咗，要奧瑪仕通知其他股東有人換股。不過如果大家睇吓佢哋「第一代」關於有人換股嘅通告，睇落去仲好似係好消息。因為奧瑪仕永遠將焦點放喺每一次換股得來嘅20萬元，話又再次「成功增加公司資本」，唔信你可以去港交所網站睇睇。
到05年初，持票據嘅人換股速度係快到連Bloomberg機都跟唔住，經常報細股數，如果你當年攞希臘神話賭場提供嘅盈利預測去計奧瑪仕每股應佔盈利，咁就中咗招。
不過到今時今日，奧瑪仕換股嘅情況就清晰好多，起碼𠵱家嘅通告會提供一個「一目了然」、小股東如何被溝淡表。根據噚日張表，奧瑪仕仲有10張可換股票據未換股，而呢10張票據仲可以換多40幾億股，真係仲有排換。
所以，各位想做企業融資銀行家嘅朋友，最好就係讀熟959奧瑪仕呢個可以證明我哋特區財技幾咁高明嘅casestudy啦！
孫柏文