市民購買電器時，宜了解損壞時，由代理抑或出售的電器店負責維修，並驗收保用證或要求於收據清楚註明條款，以保障權益。
讀者陳小姐投訴，本年5月於觀塘地鐵站一店舖，購買MP4機，事後店方卻推卸維修責任。她說：「我買咗部MP4機，當時『八方社』強調係行貨，不過保用證同說明書一時唔知放喺邊，應承候補，於是我就買咗！」
充電時發出異聲
陳小姐使用MP4機後發現有異常。她說：「充電時會發出『吱吱』聲，擔心有危險，就想攞番保用證去維修，點知對方就唔承認有咁嘅事，佢哋喺收據上淨係寫欠說明書。幾經交涉，先話會攞去整，張單度仲寫明『保用查機』、『試取回行保修』字眼。點知後尾佢哋乜都唔做，連本說明書都畀唔到我，真離譜！」
八方社電訊公司負責人楊先生，向本報承認陳小姐所購貨品為行貨，至於其他問題則需時調查，惟之後，記者卻一直未能聯絡上楊先生。而代理該貨品的捷成洋行銷售部經理蘇先生稱，該公司沒有紀錄顯示，被投訴的店舖曾拿MP4機要求捷成檢修，但不排除通過第三者送修的可能。
檔案編號：0803026
保養有實質價值
法律界人士梁永鏗指，店方推卸維修責任，消費者可循小額錢債處追討。他說：「保養都有實質價值，一年可能要幾百蚊。追究就要睇證據，行貨要有保用證，水貨應要求店方喺收據寫明維修期限、範圍同收費。」
至於店方是否「反口」，可透過各細微證據判斷。梁永鏗說：「類似陳小姐個案，睇吓有無人證聽見店員話係行貨，店方多唔多同類投訴，以及『白紙黑字』寫明『保用查機』、『試取回行保修』等，如果根本無聯絡過代理，加埋睇，店方講大話嘅可能性就增加。」