Fede大半生居住西班牙，爸爸係法國人媽咪係西班牙人，由細到大都食媽咪親手煮嘅西班牙菜，一年前開始居住香港嘅佢話：「喺香港好難搵好味嘅西班牙菜，通常好味嘅都好貴，因為食材由西班牙入口，所以想食一餐啱口味嘅西班牙菜唔容易。」兜兜轉轉，佢終於搵到心水餐廳：「有次嚟蘭桂坊飲嘢，發現『LaBodega』竟然有正宗Tapas食，價錢唔算貴，喺中環區嚟講絕對可以接受。」究竟乜嘢係Tapas？「Tapas西班牙文解Cover（蓋子），傳說18世紀有個西班牙皇帝，好鍾意擺塊火腿喺杯酒上面，用嚟擋塵同烏蠅，慢慢Tapas就指細細份嘅佐酒小食。」
Fede都算識食之人：「近年開始流行食Tapas，好多餐廳都話自己有Tapas食，無錯係符合Tapas細份量嘅原則，但用嘅食材同做法根本就亂嚟嘅。『LaBodega』用嘅係西班牙食材，兼且用一小碟份量上碟，咁先係正宗Tapas。」一有時間，Fede就會同佢嘅西班牙籍朋友嚟食嘢，不過最令佢開心嘅係其他國籍人士都嚟食西班牙菜：「開心大家都鍾意我家鄉口味嘛。」
記者：黃若茵
攝影：譚盈傑
西班牙凍湯$48
西班牙特色菜，用番茄汁、檸汁等煮成清淡新鮮嘅凍湯，加塊麵包一齊食，清涼口感炎夏飲最正。
蒜香煎炒蝦$64
最好賣小吃之一，醬汁好惹味，蝦肉好彈牙，除蒜茸炒，亦可選擇加辣椒炒，味道更香口。
蒜香炒鮮魷$62
餐廳唔用冰鮮魷魚，落得鑊嘅全部都係新鮮貨，咬落唔韌炒得勁香，入口甚至有烤過嘅味道。
LaBodega（25247990）
地址：中環蘭桂坊德己立街42號