收到老友來電，叫思哲見識一份筍工。嘩！邊度有咁大隻蛤乸隨街跳？原來有闊佬登報出年薪100萬銀，請人陪太子讀書，服侍幾位10至12歲少主，更講到明要請新鮮出爐嘅大學畢業生，精通英文，廣東話同普通話就一般都可以，最重要反而是曾代表大學泳隊出賽。
思哲大膽建議，要見得成呢份工，千祈要拋棄一般打工仔心態。諗住搵夠即走慢慢歎嘅人，怕且都咪使旨意會見得成呢份工。闊佬之所以高薪請個freshgrad.做太傅，表面上是希望少主有個年紀接近嘅有為青年教游水，背後其實係要有人貼身了解少主成個青春期嘅成長過程，再樹立一個好榜樣，所以又點會請個諗住做兩三年就走嘅人呢？而且呢種鬥心不足嘅人，根本未足以為少主樹個好榜樣，更加難以被老闆睇得起。
不過，思哲就覺得闊佬應該出手再重啲，因為撇開班補習天王唔講，少數頂級私人補習老師，時薪已經過千，每日教四個鐘，一星期五日，年薪就過百個；唔做補習，若以加入政府做AO計，無驚無險三五七年，年薪已挨近百個，還未計算可觀的仕途；向商界發展，錢途就更加無可限量，分分鐘不消幾年就已經夠數。真正叻仔又豈會為如此一百個而動容？
雖然拆過條數後，呢份工並唔係一面倒咁討好，不過凡事往好處想，要知道當少主入名牌大學後，一轉身，就算唔做家族生意嘅掌舵人，都會係世界精英級的領袖，若能成為少主推心置腹嘅密友，太傅大可師憑徒貴，打入上流社會圈子，如果咁諗，委身陪太子讀書亦未嘗不是一條出路。
YouTube收視少過TVB
登登登dang…YouTube本月之星，竟然是一位自拍嘅靚女製片，佢將三年嚟每日嘅自拍照，串連成一段67秒嘅短片擺上網。（如果閣下有興趣睇吓嗰段片，可以上 http://youtube.com/watch?v=55YYaJIrmzo）
睇完女主角的花容三年來風雨不改，你會發現佢幾年來嘅心機，原來係要宣傳佢間製作公司。其實，用YouTube免費宣傳絕非新鮮事，YouTube成為經濟學入面「freerider」最新嘅案例，事實上YouTube不單止蝕抵咗畀千千萬萬嘅Marketing人同埋獨立創作家，收唔到廣告宣傳費，仲會俾嗰啲立心不良嘅user，拍條片再透過YouTube發放，打擊甚至乎醜化對手嘅產品。唔信？本地都有例子，隨便到YouTube搜尋一吓吧。（提示：Keyword為「香港」加「自拍」加「搞笑」）
現在任憑誰都識講：「Contentisking」。一個本地例子係，有網絡商以收費電視業務行頭的策略（仲推出唔賺錢嘅MOOV），海外嘅例子就係YouTube，甚至有人會話，將YouTube嘅UserInterface執一執，不就是一個跨國性嘅媒體集團？而且身價更加會由50億港紙增至80億港紙，大有模仿Google並為IPO作前期準備。
不過，思哲認為咁樣諗未免開心得太早，因為如果你將YouTube「電視化」，佢哋每日有100萬段短片下載，以每條片長兩分鐘計，佢每日只有200萬分鐘收視，換言之，收視率少過半個TVB。當然，YouTube能夠賦予嘅商業價值，無論以觀眾嘅互動性同注意力，都會比TVB嗰隻傳統電視廣告佔優。
對正target再addvalue
雖然仍然有人話虛擬世界未成氣候，不過事實證明成間Google雖然只得近八千個員工，但上季業績單是營運收入已有24.6億美金，接近200億港紙，平均每個員工幫公司搵成200幾萬港紙，絕對高增值，而且收入數字仍然穩步增長，如此明日之星去邊處搵？
Google厲害之處，不但係全球最大嘅廣告平台，而且百發百中。其實廣告商落廣告只會睇中唔中target，唔中target就話知hitrate有幾多。以前做廣告，一千點收視無可能見效，因為根本唔知target中唔中，所以廣告商只好有殺錯無放過。之不過時移世易，今時今日大家對電腦多過對電視，睇網站多過睇報紙，賣廣告無的放矢與儍仔無異，而且上Google打「原子筆」三隻字，即刻有贊助商（即係廣告商）資料顯示在旁，用家要原子筆，就畀原子筆，甚至拍子簿，但就一定無擦膠，直頭係廣告嘅dreamscenario。
虛擬世界尚且物盡其用，但偏偏現實世界就有好多平台，冇好好學Google把握機會轉型。以報紙為例，廣告版其實有大把發展空間，好似分類小廣告，又名廣告專版，成版填得密密麻麻，以為咁就最賺到錢，但當讀者揭到廣告專版，多數只有三個動作：
1.即刻飛去下一頁
2.下一頁都係，再飛去下一頁
3.索性成叠抽起，掉落垃圾桶或者墊煲底
賣廣告無非要人睇，廣告專版反而加速趕客，AE又點同客交代，莫講話嗌高啲廣告費。
既然報紙早已將相關版面廣告歸類，點解唔學Google，將客戶對到正target？律師行廣告專版，索性add多少少value，加過法律信箱製造interaction，既可造就機會畀AE同客有所交代，大大聲話睇親呢版嘅人，都有興趣知法律嘢，唔單止中晒target，仲可以順手嗌高個價，相得益彰。
如果連財務公司廣告同補習社廣告都用呢個方法addvalue，報紙廣告分紅又點會唔肥仔？
尹思哲