裴唯瑩13歲時憑唱鄧麗君的歌曲而為人認識，女大十八變，5年後她已長得亭亭玉立，初登銀幕就與迷倒萬千少女的陳冠希做對手戲，在《狗咬狗》中飾演一名被父強姦的弱智少女，為了在娛樂圈闖一番事業，十分拼搏。
有小鄧麗君之稱的裴唯瑩（裴裴）已不再是當年參加歌唱比賽的13歲小妹妹，長得亭亭玉立的她絕對是18歲卜卜脆，還簽了林建岳旗下的紅館經理人公司，並獲點名力捧，早前她便到日本接受歌唱及舞蹈訓練，目前則在上海修讀演藝課程，4年後才正式畢業，但為展開香港的演藝工作，平均一個月就會飛來港一次。
「Edison教做戲」
裴裴首部擔演女主角的電影《狗咬狗》，演一個輕度弱智少女，遭獸父強姦，演殺手的陳冠希（Edison）殺了其父，二人因而展開一段無言的愛。問她自覺演得怎樣？正努力學習廣東話的裴裴，以不純正的廣東話爽朗地說：「OK㗎！第一部戲，冇諗過可以做女主角，Edison有教我做戲，畀好多意見我，我覺得佢做戲好畀心機，有場戲講我死咗，佢對住我好傷心，我都係首映睇番部戲先知，原來佢演得咁有感情，因為拍嗰時講我死咗要合埋雙眼，好可惜現場睇唔到。」
不敢亂出夜街
離鄉別井，問裴裴其母會否擔心她單獨在香港會學壞？她說：「媽咪好相信我，我哋每日都會打幾個電話，媽咪叫我要飲多啲水，注重身體，唔好亂走，我唔會去夜街，因為我只係鍾意瞓覺，冇事做就瞓囉！」
採訪：魯萍 攝影：陳偉權 協力：羅慧敏
化妝：HeidiChun
髮型：KenQiofPrivatei
服裝提供：XGame、Triumph（泳衣）
