噚日落大雨，即刻好開心，因為可以着新買嘅Cross涼鞋。去到戲院，兩個friend小魚同Wincy都着緊同款嘅鞋，大家就互相讚有taste啦。：)
睇完戲，佢兩個攞盒自製沙律出嚟食，佢哋話街外嘢唔健康，鍾意食自己整嘅沙律，但兜沙律睇落好似雀粟咁！小魚話本來想放隻烚蛋落去，但發現啲蛋壞晒。
問佢哋平時點放啲蛋，佢哋話：「唔係擺蛋都有學問呀？」
哈，就係，呢樣嘢係傳染病專家勞永樂教我㗎。勞醫生話，擺放雞蛋，圓嘅一邊要向上，尖嘅就要向下；因為雞蛋裏面有一個氣室，儲存咗空氣，畀隻蛋有足夠氧氣維持新陳代謝，而氣室就係喺圓嘅一邊：「所以剝開隻烚蛋，就會見到圓嘅一邊係凹咗入去。」
佢話，如果圓嘅一面向下放，蛋白會壓住個氣室，影響氣室運作，隻蛋無咁新鮮；另外，氣室因為密度較低，會慢慢向上升，就會掉翻轉壓住啲蛋，破壞蛋嘅組織。
佢仲話，買啲蛋返嚟如果有污糟嘢甚至雞屎，要洗一洗，但唔可以洗太耐，或者用水浸佢，因為蛋殼表面其實有好多極微細嘅孔，細菌會隨啲水入埋隻蛋度，「洗完之後記得抹乾佢。」
逄周一至周四刊出