禮拜日中午在沙田飲茶，見到煲呔坐喺角落頭張枱，曾太打扮樸素，好客氣同隔籬枱打招呼，兩點左右食飽飽就埋單走人。八方跟住亦埋單，因為要趕過海去參加反銷售稅遊行，捧吓民主黨場。
講起銷售稅，繼自由黨方剛帶頭反對之後，工聯會王國興接力，昨日輪到民主黨。一個上中下左中右都反對嘅稅，真係唔知有乜機會會成功；繼續諮詢落去，只會出現更多荒誕嘅事，令唐唐失多啲分。
第一荒誕就係所謂諮詢。嗱，政府話明𠵱家係諮詢期，想聽多啲意見，但係佢哋就好有立場，你贊成就得，你反對我就發惡，咁即係假諮詢。最明顯例子就係肥彭，佢嚟香港賣書，俾記者問到點睇銷售稅，不過隨口講咗一兩句意見，唐唐即刻惱羞成怒，口出惡言話肥彭「拍拍屁股就走」。咁冇器量，點聽意見？
不如叫任志剛做好啲
更加荒誕係噚日，民主黨遊行反銷售稅之後，政府發言人出嚟回應，竟然叫反對嘅人想個方法出嚟，確保下一代有足夠資源，應付未來不斷增加嘅社會服務需求，並保持香港長遠經濟繁榮穩定云云。真係噏得出就噏。
喂，你𠵱家諮詢，我哋提意見，盡晒公民責任啦。叫我哋想方法解決問題？你份糧係咪我出埋先？咁第日反對填海，咪又要幫你諗埋點樣起路改善交通？反對空氣污染，就要教你點樣發電？
至於話保持經濟長遠繁榮穩定，更加笑死人。香港經濟除咗簡單稅制，請問仲有乜嘢優勢？連呢樣嘢都消滅埋，想唔死都幾難，反對銷售稅，正正就係為咗長期繁榮穩定，咁都唔明？
算喇，你話要想個方法，咁就幫你想個方法。任志剛總裁揸住一萬億儲備，回報3個巴仙。不如叫佢一係做好啲一係乜都唔做，提高2個巴仙回報咁每年收入就等於銷售稅所得嘅錢（扣咗行政開支同補貼，徵銷售稅大約每年可得200億）。咁5%回報率，八方個基金經理都唔止啦，任總咁英明神武，點會搞唔掂呢；諗諗佢啦唐司長。