特首煲呔要強政勵治，朝廷求才若渴，好多有才幹嘅年輕政務官唔再單憑論資排輩擔櫈仔升職，只要有實力，都有上位機會，其中前扶貧委員會秘書長謝凌潔貞最近升職，去咗政制事務局做常任秘書長，八方都唔記得恭喜佢。
謝太份新工已經上班兩星期，由於新職位涉獵層面廣，𠵱家正努力熟習新崗位，不過以政務官慣於定期調動嘅特質，相信唔難適應，只不過今次變動，走得有啲急。謝太話，佢之前有兩個職位都係做咗唔夠半年，其中一個係97年初喺回歸辦事處協助羅范椒芬，當時真係做到冇停手，𠵱家諗番起都覺得犀利。
謝太最近同屋企人去雲南麗江旅行，喺嗰度打波騎馬之餘，亦把握機會同當地人聊天，發覺當地人雖然窮，但安貧樂道，唔會自怨自艾，唔會想搵大錢，呢份自食其力嘅心態，令佢好感動。
謝太返到香港不時同人推介麗江，認為值得去旅遊，而且仲希望自己下次有機會再去，不過就唔想再住五星級酒店，反而想試吓入住類似民宿嘅客棧，領略一吓當地風情。