八方噚日去咗「我們的啟德」公開論壇，見到梁家傑，佢平時喺立法會字字鏗鏘，估唔到對住班住咗幾十年嘅九龍城居民，即刻化身梁老師，猛咁叫居民表達意見，出席嘅居民即刻乖乖填意見表。真係不愧為大狀，講句嘢都有說服力啲。
梁家傑話其實啟德有成200幾公頃，唔需要一次過規劃晒。佢唔想咁早落實所有規劃，原來係因為佢仲好念舊，「見到啟德，真係可以發思古之幽情。」仲話想幫啟德做多啲文化保育，保留呢個歷史遺迹。
遲吓觀塘同土瓜灣都會重建，梁家傑話好想政府留番啟德部份地皮，起屋安置受影響嘅居民，仲話唔想第時啟德變咗「城市孤島」，應該起條橋駁去觀塘。公民黨就呢件事寫緊報告，下星期會同公眾講，有意見嘅人士可以搵佢傾吓。