除咗按揭業務之外，近期銀行界好注重搞信用卡。雖然香港卡戶已經超過一千萬，但仍然有唔少賓卡話，信用卡市場仲有得做。梗係啦，年息成廿幾三十厘，好肥仔。即使「正面資料」已經齊備，信用卡息率仍未見有下降迹象，因人而異地計息仍然係得個講字。
花旗銀行算係比較有誠意，佢哋話𠵱家研究緊推出「個人化利率」，希望今年內可以成事咁話；另外，經過兩年時間籌備後，佢哋噚日推出咗「即場取卡服務」，即係話當你行緊街時，見到某間舖嘅心水貨品要用花旗信用卡至有折嘅話，可以即場申請番張卡，個零鐘頭後就有。
不過，即日出卡嘅最高簽賬額只得1萬元，花旗暫時只喺旺角朗豪坊推出呢項服務，客戶可以喺港九各處巡迴嘅信用卡流動小巴即場取卡，有啲似以前捐血巴士咁。
中銀有先例
華華記得以前中銀同某間家具店，曾經合作即場出卡，客戶只要肯申請，可獲贈折扣券用嚟購物。但有少少唔同，係呢張中銀卡要遲啲先會寄出，畀錢買家具，可以用現金或者其他銀行信用卡。咁益客戶同其他銀行嘅推廣優惠，睇怕只得中銀至做得到。