上周六英超聯第一周賽事，最搶鏡係邊個？唔係亨利、唔係比拿美，而係尼日利亞前鋒簡奴，呢位賽前先至免費加盟樸茨茅夫嘅前鋒，估唔到後備上陣31分鐘就差啲大演帽子戲法，真係龍咁威。
浮沉英超聯多年嘅簡奴，用兩個頭槌攻門，協助樸茨茅夫大勝布力般流浪3:0；佢完場前仲有一個入球機會，可惜操刀12碼宴客，用頭槌補頂又僅僅貼柱出界，如果唔係簡奴第一場替「老樸」上陣就入3球，真係唔講得笑。
哈利列納兜圈讚自己
仲有，布力般流浪嘅尼爾同埋安廸杜特喺賽事中領紅牌出場，都係因為侵犯簡奴所致，所以話簡奴今仗有出色表現，絕對係實至名歸。下場隨時有機會攞埋個正選位踢，認真吐氣揚眉，話晒佢喺英超咁耐，正選機會愈來愈少，上季效力西布朗都要同其他前鋒爭位，所以今次仲唔乘勢搶閘？
「老樸」領隊哈利列納賽後就大讚隊中一批新加盟嘅球員，好似蘇甘保、占士同埋格連莊臣，當然亦有讚簡奴，大勝布力般3球的確係一個好開始，哈利列納咁講亦即係讚番自己羅致新球員有眼光啫！如果玩FantasyLeague都識得搵「老樸」球員，咁就真係同哈利列納不相伯仲囉！
「簡奴第一周比賽就省入兩球，仲威過亨利，『老樸』領隊哈利列納賽前決定買佢返嚟，相信連佢都估唔到簡奴咁快有回報，真係可以話佢有眼光又得，話簡奴行運亦得，總之就得咗！」