儘管阿婆阿公都學上網，寬頻上網服務嘅市場就愈嚟愈難做，網絡公司要爭取客戶，就要畀多啲心機。靜咗好耐嘅香港寬頻，上個月攞咗亞太顧客服務協會（APCSC）舉辦嘅05最佳顧客服務中心及2005最佳客戶熱線中心大獎後，都係時候做番啲嘢啦，唔係嘅話，香港人好善忘㗎。
近排佢哋終於有新搞作，sell佢哋嘅極速寬頻上網服務。新客仔只需登記「bb100」光纖寬頻上網服務計劃，簽約兩年，即送四個月免費服務，即平均每月收費215元，可收睇免費數碼電視基本頻道及24小時新聞台，兼夾24個月免費bbWATCH網上電視。
佢哋家吓仲學埋銀行開信用卡嗰招，就係優惠客戶買流行電子產品，例如以優惠價出部NokiaN73手機，唔要手機亦可用優惠價揀番部NDSLite任天堂雙畫面手提遊戲機及iPodnano2GB。
攞咗個服務大獎，自然要晒吓啦，佢哋於是喺宣傳單張上寫明，話根據電管局資料，過去兩年冇收到不當促銷嘅投訴。比起對手，呢樣嘢幾難得。