光華新聞文化中心主任路平上周五請咗余秋雨嚟香港，仲出咗個題目畀佢講，叫「文化長河中的台灣」，八方覺得個題目好有意思，用政治、經濟、社會等起題，都一樣有意思。余秋雨係作家，梗係唔多講政治啦，不過佢貴為「旅行作家」，經常到各地遊覽，閱歷非常豐富。
呢位經常穿梭內地同台灣嘅文人，對台灣先是讚賞，然後講吓佢嘅文化隱憂。佢話覺得台灣有文化優勢，因為台灣嘅精英文化人，大眾都認識，但係內地嘅文人同學者就遠離老百姓。余秋雨仲話台灣嘅娛樂文化搞得好好，帶畀人無限歡樂，估唔到呢位文人唔係淨係埋首寫作，都有睇吓娛樂新聞。
余秋雨魅力沒法擋，八方見講座全場爆滿，不少人仲係由台灣遠道而來；路平就話俾佢迷住：「余秋雨文章好之外，聽他講說話真係人生一大享受。」