紅館昨日座無虛席，全是為捧中國女排而來，該隊12名成員中，你猜誰最得球迷歡心？訪問結果，隊長馮坤、「閃電美人」劉亞男及年僅18歲的「大梅」王一梅先拔頭籌。
石珮瀅
「我睇咗女排大獎賽好多年，以前讀女拔萃時係校隊大槌手；鍾意王一梅，除咗打波勁外，佢個人好得意，而且年紀輕輕就打得咁出色。今次嚟嘅中國女排都唔錯，除咗李娟外，整體都唔夠靚。」
謝穎紅
「打沙排前，我曾經係香港青年軍成員，一直都有留意中國女排，我覺得中國嘅快攻是最出色，最欣賞當然係快攻主力劉亞男。𠵱家嘅中國隊如果能加強新人好似王一梅、徐雲麗嘅戰術變化，會更出色。」
阿茵、阿珊
兩人係校內排球隊友，阿茵做副攻，阿珊係自由人；兩人不約而同咁話：「我們係喺中國女排攞完雅典奧運金牌後才開始留意佢哋，覺得馮坤喺場上好有威勢，帶領得頭頭是道，而且屢創佳績。」
葉小姐
「我由小學4年班開始追中國隊，覺得馮坤好勁，尤其是佢今次帶傷隨隊，都堅持打足3日，而且場場都上陣；另外，年紀輕輕的王一梅都很搶鏡。」
