資深股票客戶謝太：喂Karen，上個星期個股市點樣？好似好犀利。
年輕貌美經紀Karen：謝太，上星期個股市創六年新高，係六年新高囉！仲要好似六年前一樣，又係電訊股帶動。
謝太：電訊股？唔通又係李澤楷作怪？電盈（008）唔係已經跌左好多咩？仲可以郁度恒指？
Karen：六年前，無錯係電盈同個股市一齊上歷史高位。李澤楷畀人感覺佢係一個憑着互聯網可以打破傳媒、通訊壟斷，又可以憑着數碼港壟斷香港地皮搵大錢既「ITGuy」。不過今次唔同，今次係憑中移動（941）創多年新高，來推動股市上升。中移動暫時都係恒生指數第二最大成分股，佢創新高，個市好難唔郁。就連有無厘頭3G大石拗頸嘅和記黃埔（013），都有份升，你話係唔係電訊股推動？
謝太：嘩！連和黃都升，好似個市又旺番。
Karen：係啊，自從上星期好多睇淡、買跌嘅人因為啲熊證觸動到回收機制，好似我哋咁「全軍覆沒」之後，敢大大聲睇淡嘅人差唔多冇晒。不過，外國仲有一個敢大聲睇淡嘅人係度，佢每個星期都會用電郵寄出佢嘅睇法，佢個名叫做JohnMaudlin，佢從未賣過廣告，但每個星期有超過一百萬人收到佢嘅電郵。佢今個星期寄出嚟嘅電郵就真係嚇死人。
謝太：係？佢講的乜咁嚇人？
Karen：首先，佢睇1987年美國股市嘅走勢圖表，真係同而家有啲相似。佢話如果美國股市下跌挑戰5、6月低位成功，咁就會好似1987年。
謝太：股災？唔係嘛？佢仲講啲乜？
Karen：佢仲有話美國經濟一定會衰退。佢話長債息率低過短債息率，已經係一個非常準確嘅預測。萬試萬靈。不過最嚴重就一定係佢話美國啲公司盈利，佔全國生產總值嘅比率，高過歷史嘅平均比率好多，如果回復到歷史嘅平均比率，美國公司嘅盈利就會急跌。
通脹始終是隱憂
謝太：美國經濟唔得，美國中央銀行聯邦儲備局會減息，到時候熱錢湧到，個市應該升。
Karen：弊在佢話通脹率其實完全未受控制，呢個我都同意，因為就算上個星期美國嘅通脹率「低過預期」，通脹率又再創新高，去到2.7%。當然，市場好似完全唔怕通脹。我諗市場參與者已經被催眠，完全唔理會通脹嘅威脅。
謝太：催眠？點樣催眠啊？
Karen：聯儲局成日都話會留意「核心」通脹指數，而唔係總體通脹指數。原因係佢哋話「核心通脹指數」冇能源、食物等價格比較飄忽嘅元素，所以可以比較準確地觸摸通脹壓力。不過，如果話能源、食物價格飄忽，就等如呢啲元素有時會比通脹高，不過有時亦會比通脹低。而最弊就係能源、食物價格根本就係好穩定咁增長。聯儲局有幾咁玩火都毋須多講，因為美國今時今日嘅通脹率係超過4%，如果聯儲局主席伯南克唔係美國中央銀行行長，而係喺英國、紐西蘭等國家搵食，咁已經會被硬性規定革職。
謝太：真係睇定啲先再算。